Archiŭ Karmiłkina
Uładzimier Karmiłkin, jakoha hramadztva niadaŭna pravodziła ŭ apošni šlach, byŭ nia tolki “frontaŭskim fatohrafam”, što zdymaje mitynhi j kulturnyja imprezy. Jahony archiŭ — sapraŭdny letapis našaha žyćcia, usiaho, što zakranała nas.
Dačka U.Karmiłkina Milita kaža: “Ja navat nie padazravała, što ŭ adnoj kvatery možna sabrać stolki materyjałaŭ — hory i hory! Vielmi šmat hazetaŭ — ad vielmi starych da niadaŭnich. Videakasetaŭ — kala dźviuch sotniaŭ. Tata zapisvaŭ usio, i nia tolki toje, što tyčyłasia Biełarusi. U jaho zachavalisia videazapisy, pryśviečanyja i padłodcy “Kursk”, i teraktam u Amerycy 11 vieraśnia. Tam jość prosta ŭnikalnyja zapisy: adzin i toj samy čałaviek havoryć adno, a praź miesiac — zusim procilehłaje”.
Farmalna archiŭ Uładzimiera Karmiłkina naležyć Biełaruskamu Narodnamu Frontu: jon i stvaraŭsia jak archiŭ BNF, a Ŭładzimier byŭ jahonym zachavalnikam. Aktyvist BNF Uładzimier Kiškurna — adzin z tych, chto dapamahaje Milicie razabracca z baćkavymi skarbami: “My vyvieźli pakul častku archivu — jana źmiaściłasia na troch lehkavych mašynach”.
Samaja kaštoŭnaja častka spadčyny Ŭładzimiera Karmiłkina — jahonyja fatazdymki. Najbolšuju vartaść hety fotaarchiŭ budzie mieć, kali zastaniecca cełym, nie raściarušycca pa pryvatnych kalekcyjach. Chto zdatny źbierahčy jaho jak adzinaje cełaje? Milita kaža, što paśla śmierci baćki da jaje źviartalisia supracoŭniki Dziaržaŭnaha archivu kina- i fotadakumentaŭ, što mieścicca ŭ Kojdanavie, — prasili pieradać archiŭ im. Adnak sama dačka Karmiłkina addała pieravahu Archivu najnoŭšaje historyi. “Ja vyrašyła pieradać usio ŭ adny ruki, — kaža Milita. — Praŭda, tam jość niekatoryja tečki, na jakich napisana, kamu kankretna jany adrasavanyja — naprykład, “Adamoviču”. Ja paprasiła supracoŭnikaŭ Archivu pieradać takija tečki hetym ludziam”.
Zbor U.Karmiłkina ŭvojdzie ŭ Archiŭ najnoŭšaj historyi asobnym fondam. Ciapier supracoŭniki Archivu paradkujuć nieźličony skarb, pieradadzieny im. Dyrektarka Fondu Łarysa Androsik kaža, što na adzin tolki razbor i apisańnie archivu Ŭładzimiera Karmiłkina pojdzie niekalki tydniaŭ, a mo i miesiacaŭ.
Arkadź Šanski
Kamientary