Školnyja abiedy: u nas i ŭ ich
Błoh dziaŭčynki z Šatłandyi staŭ siensacyjaj: 1,5 miljona naviednikaŭ za 3 tydni.
Usio pačałosia z taho, što 9-hadovuju žycharku Šatłandyi Martu Pejn nie zadavalniała ježa ŭ školnaj stałoŭcy. Dziaŭčynka pačała fatahrafavać školnyja abiedy i źmiaščać fota ŭ błohu, stvaryć jaki dapamoh baćka.
Kožny zdymak aceńvaŭsia pa 10-balnaj škale vydumanaha joj «abiedamiera».Marta taksama adsočvała karysnaść stravy, vieličyniu porcyi (kolkaść kavałkaŭ-hłytkoŭ), košt abiedu i navat kolkaść znojdzienych vałasoŭ (što, na ščaście, ni razu nie zdarałasia).
Błoh z fotazdymkami «mizernaj» ježy niečakana nabyŭ vialikuju papularnaść.
Za niekalki tydniaŭ jaho prahledzieli 1,5 miljona razoŭ. A na elekronnuju poštu Marty stali prychodzić fota školnych abiedaŭ z usiaho śvietu.
Sajt 9-hadovaj dziaŭčynki pryciahnuŭ uvahu suśvienych ŚMI i prychilnikaŭ zdarovaha školnaha charčavańnia. Papularnyja brytanskija televiadučyja zaprasili jaje z baćkam paŭdzielničać u svaich kulinarnych šou.
Viadomy povar Džejmi Oliver dasłaŭ školnicy svaju knihu z podpisam «Vydatnaja praca! Małajčynka, rabi heta i dalej!». Oliver vystupaje suprać prodažu ŭ škołach fastfudu i słodyčaŭ. Dziakujučy jamu šmat u jakich škołach Brytanii paŭfabrykaty zamianili na «zdarovyja» stravy.
Adnak samaje hałoŭnaje – dziaŭčynka damahłasia źmienaŭ u školnym mieniu.
«Heta zdaryłasia siońnia! U čarzie pa abied nam aficyjna paviedamili, što zaraz nam dazvalajecca brać stolki harodniny, sadaviny i chleba, kolki chočam»,-- paviedamlaje Marta ŭ apošnim dopisie na sajcie.
U Biełarusi vučniam pačatkovych kłasaŭ dziaržava harantuje biaspłatnyja śniadanki. Zhodna z narmatyvami, raschody na charčavańnie adnaho dziciaci (6-10 hadoŭ) składajuć 8 820 rubloŭ (dla paraŭnańnia: abiedy Marty kaštujuć 2 funty sterlinhaŭ, ci kala 25 tysiač rubloŭ).
Cikava, a što varta pamianiać ci palepšyć u školnych abiedach u Biełarusi? Dasyłajcie prapanovy na [email protected] abo na inšyja adrasy Redakcyi. Abo pišycie tut u kamientach.
Kamientary