Jeŭraparłamient unios pytańnie ab situacyi ŭ Biełarusi ŭ paradak dnia plenarnaj siesii

Zhodna z paradkam dnia, raźmieščanym na sajcie Jeŭraparłamienta, biełaruskaje pytańnie budzie razhledžana razam ź jašče čatyrma ŭ pieryjad z 15 da 21 hadziny pa siaredniejeŭrapiejskim časie (z 17 da 23 — pa minskim).

Čakajecca, što z zajavaj pierad jeŭraparłamientaryjami vystupić viarchoŭny pradstaŭnik ES pa źniešniaj palitycy i palitycy biaśpieki Ketryn Eštan.

Pa vynikach debataŭ płanujecca pryniać rezalucyju, hałasavańnie pa jakoj u paradku dnia zapłanavana na 15 sakavika.

Na minułym tydni vice-śpikier Jeŭraparłamienta Jacak Pratasievič zajaŭlaŭ, što na siesii, jakaja pačniecca 12 sakavika ŭ Strasburhu, biełaruskaje pytańnie abmiarkoŭvacca nie budzie.

«My śpiecyjalna vyrašyli rezalucyju pa Biełarusi ŭchvalić praz dva tydni, padčas siesii ŭ Brusieli», — havaryŭ Pratasievič u intervju «Radyjo Svaboda».

Vice-śpikier Jeŭraparłamienta adznačyŭ, što kanflikt pamiž Biełaruśsiu i Jeŭrasajuzam nastolki abvastryŭsia, što «ciapier zastajecca tolki adzin krok da faktyčnaha razryvu dypadnosinaŭ — paprasić biełaruskich pasłoŭ u krainach ES vyjechać na kansultacyi i takim čynam abmiežavać dypadnosiny da takoha ŭzroŭniu, jaki ciapier isnuje pamiž Minskam i Vašynhtonam».

«Hetaha nielha vyklučać, ale my vyrašyli dać čas na razvahu, pierš za ŭsio Minsku, bo heta Minsk usio pačaŭ. Moža, za hetyja dva tydni nastupić praćvieražeńnie. My nie chočam izalavać Biełaruś, ale chočam dabicca ad Minska taho, što dla nas maje asablivaje značeńnie — na siońnia heta pierš za ŭsio vyzvaleńnie palitźniavolenych», — skazaŭ Pratasievič.

27 lutaha Saviet Ministraŭ zamiežnych spraŭ krain ES pryniaŭ rašeńnie pašyryć śpis nieŭjaznych u krainy Jeŭrasajuza pradstaŭnikoŭ biełaruskaj dziaržavy, uklučyŭšy ŭ jaho jašče 21 proźvišča. 28 lutaha biełaruskija ŭłady rekamiendavali kiraŭniku pradstaŭnictva Jeŭrasajuza Majry Mory i pasłu Polščy Lešaku Šarepku «vyjechać u svaje stalicy dla kansultacyj, kab davieści svajmu kiraŭnictvu ćviorduju pazicyju biełaruskaha boku ab nieprymalnaści nacisku i sankcyj». U adkaz na heta ŭsie krainy ES adklikali svaich pasłoŭ ź Minska.

Lidary krain Jeŭrasajuza 2 sakavika na samicie ŭ Brusieli zaklikali Saviet ES pryniać «dalejšyja miery» ŭ dačynieńni da Biełarusi. Udzielniki samita vykazali «surjoznuju i hłybokuju zaniepakojenaść praciaham paharšeńnia situacyi» ŭ krainie.

Jany taksama vitali rašeńnie Savieta ES pašyryć śpis asob, da jakich prymianiajucca vizavyja i ekanamičnyja sankcyi Jeŭrasajuza ŭ suviazi z tym, što hetyja asoby adkaznyja za parušeńni pravoŭ čałavieka, represii ŭ dačynieńni da apazicyi i hramadzianskaj supolnaści ŭ Biełarusi, a taksama «padtrymlivajuć abo źjaŭlajucca bienieficyjarami režymu Łukašenki».

U vynikovym dakumiencie samita ŭtrymlivajecca zaklik da Savieta ES pradoŭžyć pracu ŭ hetym kirunku.

• 0
• 0
• 0
• 0
• 0
• 0
• 0
• 0