Novyja praviły pastupleńnia ŭ VNU: ilhoty skasujuć, źmieniać sistemu bałaŭ

U presu trapiŭ prajekt novych praviłaŭ pastupleńnia ŭ biełaruskija VNU. Minadukacyi prapanuje admovicca ad amal usich ilhotaŭ dla abituryjentaŭ, bały pa CT pa profilnych pradmietach abituryjentaŭ techničnych śpiecyjalnaściaŭ pamnažać na dva, a na zavočnaje brać tolki pry najaŭnaści pracy.

Vytrymki z prajektu novych praviłaŭ pastupleńnia, ab padrychtoŭcy jakich amal hod paŭtarali čynoŭniki Minadukacyi, źjavilisia na partale interfax.by. Voś niekatoryja z novych patrabavańniaŭ, što mohuć być uviedzienyja pry pastupleńni ŭ 2012 hodzie.

Bolš nijakich ilhotaŭ. Amal: «Niekatoryja lhoty, da jakich tradycyjna pryzvyčailisia, buduć prybranyja: jany buduć pieraniesienyja na etap navučańnia. Ale nie ŭsie: tyja lhoty, što tyčacca sirotaŭ i hetak dalej, buduć uličvacca», — zajaviŭ ministr adukacyi Biełarusi Siarhiej Maskievič u intervju "Biełaruś-1".

Ideju admieny lhotaŭ, byccam z-za pierachodu na elektronnuju sistemu padačy dakumientaŭ u VNU (jakaja musiła zapracavać užo ŭ nastupnym hodzie, ale naležnym čynam nie była pratestavanaja ciaham sioletniaj ustupnaj kampanii), daŭna prasoŭvali čynoŭniki Minadukacyi.

Pavodle novych praviłaŭ pastupleńnia, usie lhoty pa vyzvaleńni ad płaty za navučańnie,

pradastaŭleńnie miesca ŭ studenckim internacie ci vyłučeńni lhotnaha kredytu buduć raźmiarkoŭvacca ŭžo paśla zaličeńnia.

«Viaskovaha» konkursu nia budzie

Skasoŭvajecca adna z ulublonych inicyjatyvaŭ Łukašenki ŭ śfiery adukacyi: asobny konkurs dla viaskovych abituryjentaŭ. Ciapier haradskija i viaskovyja školniki buduć mieć ahulnyja ŭmovy pry zaličeńni. Ci atrymajuć jany peŭnyja prefierencyi ŭžo paśla zaličeńnia, nie paviedamlajecca.

Miechanizm atrymańnia studenckich ilhotaŭ u apisańni Maskieviča vyhladaje nastupnym čynam: naprykład, pastupiŭ abituryjent u VNU, adnak pa bałach prajšoŭ na płatnaje adździaleńnie. Najaŭnaść lhotaŭ dapamoža jamu atrymlivać skidki pry apłacie navučańnia.

Na zavočnaje tolki z pracaj

Brać na zavočnyja adździaleńni buduć tolki abituryjentaŭ, jakija ŭžo niedzie pracujuć. Takaja norma isnavała kaliści, a ciapier jaje adnaŭlajuć u miežach kryžovaha pachodu, što raspačało Minadukacyi suprać zavočnikaŭ.

Ministerstva adukacyi maryć davieści kolkaść studentaŭ zavočnaha da 30–40 tysiačaŭ (ciapier kožny druhi pieršakurśnik — zavočnik).

Najpierš «pad nož» pojduć miescy na ekanamičnych i jurydyčnych śpiecyjalnaściach.

Atrymlivajecca, što, kab paśla škoły stać studentam zavočnaha, treba litaralna za miesiac paśla vypusknoha znajści pracu (pa budučaj śpiecyjalnaści, ci lubuju inšuju — nie ŭdakładniajecca). Pry hetym chłopcam pryjdziecca jašče i padrychtavacca da sustrečy z vajenkomam — zavočnikam užo druhi hod zapar adterminoŭku nie dajuć.

Značnaść movy pry pastupleńni ŭpała ŭ dva razy

Na niekatorych techničnych śpiecyjalnaściach buduć prymać i z 600 bałami. Adbudziecca heta z-za pamnažeńnia bałaŭ abituryjentaŭ pa profilnych testach na dva. Heta značyć, suma bałaŭ pa školnym atestacie i vynikaŭ troch sertyfikataŭ CT moža dasiahnuć 600, a nie 400 bałaŭ, jak jość ciapier.

Novaja inicyjatyva pryviadzie da devalvacyi značnaści moŭnych testaŭ (rasiejskaj ci biełaruskaj), bo kožny bał pa profilnym fizycy ci matematycy stanie roŭnym dvum bałam pa movie.

Nazvy śpiecyjalnaściaŭ, na jakich budzie dziejničać pamnažeńnie bałaŭ, jašče nie abvieščanyja. Adnak viadoma, što humanitarnyja nakirunki ŭ ich lik dakładna nia trapiać.

Uvodzicca minimalny bał pa CT

Źjavicca taksama minimalny bał, biez atrymańnia jakoha ŭ abituryjenta prosta nia prymuć dakumienty. Jak kazali raniej čynoŭniki, jon naŭrad ci budzie vyšejšym za 5–7 bałaŭ pa niekatorych śpiecyjalnaściach. Vyrašać, jaki sioleta prachadny bał, buduć užo paśla skančeńnia CT.

Inšyja istotnyja źmieny ŭ praviłach pastupleńnia

Źjavicca adzinaja mietodyka padliku bałaŭ pry pastupleńni na śpiecyjalnaści, na jakich pravodzicca ispyt «Tvorčaść». Zaličvacca abituryjenty buduć na asnovie sumy bałaŭ za kožny etap ustupnaha vyprabavańnia pa pradmiecie «Tvorčaść», plus vynik, atrymany pry składańni bałaŭ CT i dakumientu ab ahulnaj siaredniaj adukacyi.

Rasiejcy atrymajuć mahčymaść nie zdavać ekzamieny. Minadukacyi prapanuje źmianić umovy pastupleńnia dla biełarusaŭ, jakija žyvuć za miažoj, a taksama hramadzianam Rasiei, Kazachstanu, Kyrhyzstanu, Tadžykistanu. Im prapanujecca pastupać pa tych samych ŭmovach, što isnujuć dla zamiežnych hramadzian: pa vynikach sumoŭja. Pry hetym płanujecca zachavać stary miechanizm pastupleńnia dla ŭsich žadajučych, jakija chočuć skarystacca pravam na atrymańnie adukacyi praz konkursny adbor (jak za košt srodkaŭ biudžetu, hetak i na ŭmovach apłaty).

Ciapier prajekt praviłaŭ nakiravany na ŭzhadnieńnie z administracyjaj prezidenta.

• 0
• 0
• 0
• 0
• 0
• 0
• 0
• 0