ADKB nie budzie padaŭlać apazicyjnyja siły ŭ dziaržavach-udzielnicach

Arhanizacyja Dahavora ab kalektyŭnaj biaśpiecy «nie budzie padaŭlać apazicyjnyja siły ŭ tych ci inšych dziaržavach». Pra heta zajaviŭ žurnalistam 9 vieraśnia ŭ Maskvie hienieralny sakratar ADKB Mikałaj Bardziuža, papiaredziŭšy apasieńni niekatorych ŚMI, što siły arhanizacyi mohuć być vykarystanyja dla baraćby z apazicyjaj.

Bardziuža padkreśliŭ, što ADKB nie budzie vykarystoŭvać Kalektyŭnyja siły apieratyŭnaha reahavańnia (KSAR) dla abarony kanstytucyjnaha ładu dziaržaŭ — členaŭ arhanizacyi, u hetym vypadku mohuć vykarystoŭvacca miratvorčyja siły. Pavodle jaho słoŭ, pry zvarocie ŭ Saviet kalektyŭnaj biaśpieki ADKB zakonnaha kiraŭnika krainy, u jakoj adbyvajecca sproba źviaržeńnia dziejnaj ułady, SKB moža pryniać rašeńnie «adpravić u hetu dziaržavu miratvorčyja siły, ale nie KSAR». «Zadača miratvorcaŭ ADKB tolki raźjadnać supraćlehłyja baki», — cytuje Bardziužu RIA Novosti.

Nahadajem, 30 žniŭnia prezident Biełarusi Alaksandr Łukašenka na sustrečy ŭ Minsku ź Mikałajem Bardziužam zajaviŭ, što krainy ADKB abmiarkoŭvajuć pytańni ŭžyvańnia KSAR dla praduchileńnia dziaržaŭnych pieravarotaŭ. Na sustrečy, frahmienty jakoj byli pakazanyja biełaruskimi telekanałami, Łukašenka zajaviŭ, što idzie havorka «ab prymianieńni sił, nie tolki źviazanych z umiašańniem zvonku i ahresijaj, ale i ab umiašańni inšych dziaržaŭ znutry krain ADKB». «My surjozna abmiarkoŭvali hetu prablemu. Heta značnaja padtrymka krain, jakija buduć uvachodzić u ADKB. Frontam, vajnoj nichto na nas siońnia nie pojdzie, a voś kanstytucyjny pieravarot učynić ruki śviarbiać u mnohich. Viadoma, my pavinny abaraniać cełasnaść i niezaležnaść krain ADKB», — padkreśliŭ Łukašenka.

Takaja pazicyja była raskrytykavanaja ŭ Rasii. U pryvatnaści, haziecie «Iźviestija» krynica ŭ Kramli zajaviła, što Alaksandr Łukašenka «vykarystoŭvaŭ u svaich metach i vulharyzavaŭ» ideju dapamohi z boku ADKB.

Adnak 7 vieraśnia pamočnik prezidenta RF Siarhiej Prychodźka zajaviŭ žurnalistam: Rasija i Biełaruś adzinyja ŭ mierkavańni ab mahčymaści vykarystańnia patencyjału ADKB dla praduchileńnia sprobaŭ źviaržeńnia kanstytucyjnaj ułady ŭ krainach — udzielnicach arhanizacyi. «Razvažańni z krytykaj Alaksandra Ryhoraviča pa vynikach jaho acenak dziejnaści ADKB nie adpaviadajuć rečaisnaści. Jon vystupaŭ u hetaj častcy z pazicyj, jakija ŭzhodnieny z rasijskim bokam. U nas jość, jak i ŭ ich, napeŭna niekatoryja krytyčnyja acenki [na adras adzin adnaho], ale sumiesnaja dziejnaść u ADKB — nie toj vypadak», — skazaŭ Prychodźka.

9 vieraśnia ŭ hutarcy z žurnalistami Bardziuža nie vyklučyŭ, što ADKB mohuć być nadadzienyja pasrednickija funkcyi dla ŭrehulavańnia prablem pamiž dźviuma ci niekalkimi dziaržavami-ŭdzielnicami. Pavodle jaho słoŭ, u miežach ADKB užo jość mahčymaść pryznačeńnia śpiecpradstaŭnika-pasrednika pa kryzisnym reahavańni na nadzvyčajnyja situacyi. Taki ž pradstaŭnik moža źjavicca i pry nieabchodnaści ŭrehulavańnia dvuchbakovych adnosin, ličyć Bardziuža.

«Saviet kalektyŭnaj biaśpieki ŭ vypadku źjaŭleńnia surjoznych dvuchbakovych prablem pamiž dziaržavami-ŭdzielnicami arhanizacyi moh by pryznačać śpiecyjalnaha pradstaŭnika, jaki abjektyŭna, a nie subjektyŭna moža razabracca ŭ situacyi i prainfarmavać SKB, jaki na asnovie hetaha dakładu i moža pryniać rašeńnie, jakoje spryjaje ŭrehulavańniu dvuchbakovaha kanfliktu», — skazaŭ hienieralny sakratar. Pavodle jaho słoŭ, małavažnyja kanflikty pamiž krainami-ŭdzielnicami ŭžo ŭrehulavalisia ŭ miežach arhanizacyi, ale «javačnym paradkam». «Nieabchodna nadać hetaj funkcyi jurydyčnaje prava», — ličyć Bardziuža.

• 0
• 0
• 0
• 0
• 0
• 0
• 0
• 0