Prysudy za 3 lipienia — dajuć pa 15, 10 i 5 sutak

U sudach Minska pačalisia pracesy nad hramadzianami, zatrymanymi padčas akcyi maŭklivaha pratestu 3 lipienia. Pavodle źviestak pravaabaroncaŭ, sud Savieckaha rajona ŭžo vynies pieršy prysud: Andrej Tkačoŭ asudžany na 10 sutak aryštu za drobnaje chulihanstva.

U Maskoŭskim sudzie Minska Anton Hlinisty aryštavany na 5 sutak.

Andrej Hałoŭkin pryznaŭ siabie vinavatym spadziejučysia, što mieniej daduć. Jaho vyvieli z zali, taksama syjšoŭ sudździa. Žurnalisty čakajuć.

Za drobnaje chulihanstva buduć taksama tut sudzić Alaksieja Afanaśjeva, Vitala Varčeniu, Viktoryju Bandarenku, Jahora Babaja, Dźmitryja Hareckaha, Uładzimira Dudora, Arcioma Hrodnikava, Viktara Abramava, Mikałaja Astapčyka, Alenu Drobavu, Siarhieja Haŭryluka, Alaksieja Dvaranikoviča, Hannu Biazrukavu. Sudździ – Bandarenka, Kazak, Kostrykaŭ, Matyl, Kraŭčanka, Siezin, Šylko. Abiacajuć pryvieści jašče adnu partyju zatrymanych, paviedamlaje Radyjo Svaboda.

***

Hrodzienski žurnalist, aktyvist nie pryznavanaha ŭładami Sajuza palakaŭ Ihar Bancar asudžany siońnia na 10 sutak administracyjnaha aryštu (Leninski rajon Hrodna, sudździa Kozieł).

Bancar byŭ zatrymany ŭčora, 3 lipienia.

Bancara ŭžo zatrymlivali 14 červienia, u pieršy dzień pracesa nad Andrejem Pačobutam. Tady jamu daviałosia pravieści za kratami 5 dzion. Aktyvist SPB uvieś hety čas trymaŭ haładoŭku.

nn.by

***

U sudzie Centralnaha rajona Homiela razhledžana ŭžo piać administracyjnych spraŭ. Pravaabaronca Anatol Papłaŭny abvinavačany ŭ niecenzurnaj łajancy i asudžany na 15 sutak aryštu, prysud abviaściła Alena Całkova.

Śviedkami vystupili supracoŭniki pałka patrulna-pastavoj słužby milicyi (PPSM) Juryj Hryckoŭ, Uładzimir Suchocki i Alaksandr Višniakoŭ. Jany śćviardžali, što pravaabaronca byŭ zatrymany padčas akcyi maŭklivaha pratestu za toje, što hučna kryčaŭ i niecenzurna łajaŭsia.

«Ja zaŭsiody razmaŭlaju pa-biełarusku, i ŭ hetaj movie niama maciukoŭ», — zajaviŭ Papłaŭny, nie pryznaŭšy vinu.

Sudździa pacikaviŭsia ŭ Suchockaha, na jakoj movie łajaŭsia pravaabaronca.

«Nie mahu skazać, — adkazaŭ toj. — Jon havaryŭ uvieś čas pa-biełarusku i asabista na mianie łajaŭsia».

Padčas pasiadžeńnia Papłaŭny źviarnuŭsia da milicyjanieraŭ: «Na samoj spravie vy zatrymali mianie za toje, što ja fatahrafavaŭ vas. Vy vydalili maje zdymki, tamu što razumieli, što parušajecie zakon. Dyk voś viedajcie: siońnia fizičnaja pieramoha vaša, ale maralnaja — maja. Soramna hladzieć, kali supracoŭniki milicyi stračvajuć sumleńnie».

Sudździa Całkova razhledzieła spravy jašče čatyroch zatrymanych, abvinavačanych u niecenzurnaj łajancy.

Tak, Halina Starasielec, jakaja praviała minułuju noč u izalatary, śćviardžała, što naohuł nikoli nie vykarystoŭvaje nienarmatyŭnuju leksiku. Adnak suprać jaje śviedčyŭ supracoŭnik pałka PPSM Alaksandr Siujeŭ. U vyniku žančynu pakarali štrafam u pamiery troch bazavych vieličyń (105 tysiač rubloŭ). Starasielec maje namier abskardzić pryhavor. Jana taksama zajaviła, što ŭ Centralnym RAUS milicyjaniery hrubijanili zatrymanym i časta łajalisia matam.

Pavodle anałahičnaha abvinavačańnia asudžany ŭdzielniki akcyi Valeryj Chamutoŭski i Dźmitryj Ściepaniec — abodva jany pakarany dvuma sutkami aryštu.

Sprava zatrymanaha na akcyi Vasila Takarenki była razhledžana nie da kanca, bo jon zapatrabavaŭ vieści praces pa-biełarusku i admoviŭsia adkazvać na ruskamoŭnyja pytańni sudździ. Całkova dała milicyjanieram rasparadžeńnie advieści padsudnaha. Dzie zaraz znachodzicca Takarenka, nieviadoma.

Pracesy nad udzielnikami akcyi prachodziać u sudach Centralnaha i Čyhunačnaha rajonaŭ Homiela.

BiełaPAN

***

Brest

Pavodle pravaabaroncy Ramana Kiślaka, siońnia adbyvajucca sudy nad hramadskimi aktyvistami Ivanam Stasiukom, Alaksandram Čarkašynym i Arturam Anisimavym.

Usie abvinavačvajucca ŭ drobnym chulihanstvie. Artur Anisimaŭ užo asudžany na 6 sutak aryštu.

Viciebsk

Čatyroch žycharoŭ Viciebska, zatrymanych učora za toje, što fatahrafavali akcyju maŭklivaha pratestu, aštrafavali na 70 tysiač kožnaha: Maksima Dymava, Vitala Hryhorjeva, Alaksandra Fadziejeva i Vasila Kołasava.

Žłobin

U Žłobinskim rajonnym sudzie za razdaču 3 lipienia ŭlotak pra "maŭklivuju" akcyju salidarnaści pakarany siońnia administracyjnymi aryštami na 15 sutak hramadskija aktyvisty "Spraviadlivaha śvietu" Valer Rybčanka i Aleh Kastusioŭ.

Radyjo Svaboda

***

Pavodle apošnich źviestak pravaabaroncaŭ, padčas akcyi maŭklivaha pratestu ŭ Dzień Niezaležnaści ŭ Biełarusi było zatrymana prykładna 390 čałaviek: nie mienš jak 210 čałaviek — u Minsku, pryblizna 180 — u rehijonach, dadaje BiełaPAN

• 0
• 0
• 0
• 0
• 0
• 0
• 0
• 0