«Žalezny Ŭładzimier» – pravasłaŭny čyhunačnik i kahebist.
Usio bolej rasiejcaŭ bačyć u Jakuninie «pierajemnika», za jakoha prezydent Rasiei paraić hałasavać narodu na vybarach 2008 h.
58-hadovy Jakunin kiruje «Rośsijskimi žieleznymi dorohaii», u rasparadžeńni jakoj 86 tys. km rasiejskich šlachoŭ. Tamu jaho časta nazyvajuć «žaleznym Uładzimieram». Da taho ž jon sam pracavaŭ u specsłužbach.
U maładości jon rabiŭ karjeru ŭ handlovych pradstaŭnictvach SSSR na Zachadzie, što źjaŭlalisia šyrmaj dla zamiežnaj dziejnaści KDB. Hazeta «Russkaja mysl» nazyvaje jaho «kadravym aficeram raźviedki».
Siońnia były ahient KDB nadta pravasłaŭny. Jahony fond śv. Apostała Andreja, što dziejničaje za hrošy čyhunačnaj imperyi, ściahvaje ŭ Rasieju relikvii pravasłaŭnych śviatych. Na kožnyja Kalady jon pryvozić u Maskvu žyvatvorny ahoń z Chramu Božaha Naradžeńnia ŭ Jerusalimie.
Jakunin kiruje taksama Centram nacyjanalnaj słavy Rasiei, jaki arhanizuje za čyhunačnyja hrošy kanferencyi «Dyjaloh cyvilizacyjaŭ», dzie davodzicca pieravaha pravasłaŭnaj cyvilizacyi nad zachodniaj.
Adnak najvažniejšym arhumentam, jaki robić z «pravasłaŭnaha čyhunačnika» dobraha «careviča» jość toje, što niamała hadoŭ tamu razam z Uładzimieram Pucinym jon budavaŭ leciščy pad Sankt-Pieciarburham i staŭsia jahonym susiedam na leciščy. Z taho času prezydent, mianiajučy pracu, usiudy biare jaho z saboju.
Ciapierašniaja palityka Kramla zakrytaja hetak ža, jak i ŭ savieckija časy. Naziralniki, hetak ža jak i savietolahi ŭ daŭniejšyja časy, sprabujuć adhadać, što rychtuje ŭłada pavodle taje pazycyi, jakuju zajmajuć važnyja šyški na trybunach, abo pavodle taho, ci adsutničajuć hetyja šyški na trybunie. Tamu važnym syhnałam stała toje, što ŭ subotu na źjeździe «Jedinoj Rośsii» Jakunin nie ŭvajšoŭ u kiraŭničyja orhany hetaj prakramloŭskaj partyi. Mer Maskvy Jury Łužkoŭ zapeŭniŭ: heta aznačaje, što «prezydent daŭ jamu inšaje, bolš važnaje zadańnie».
A inšy siabar kiraŭnictva «Jedinoj Rośsii», prosiačy zachavać ananimnaść, hetak tłumačyŭ žurnalistam adsutnaść Jakunina na źjeździe: «U Kramli ŭvažajuć, što budučy prezydent pavinien być biespartyjny».
Kamientary