Insult: lik idzie na chviliny!

Insult — niebiaśpiečnaje i, jak heta ni sumna, vielmi raspaŭsiudžanaje zachvorvańnie. Insult — častaja pryčyna invalidnaści i śmierci. Z tych, chto pieranios insult, tolki kožny piaty moža viarnucca da narmalnaha žyćcia i pracy i amal pałova pacyjentaŭ pamiraje ŭ pieršy hod paśla zachvorvańnia.

Adna ź niepryjemnych i niebiaśpiečnych asablivaściaŭ insultu ŭ tym, što ŭ samym pačatku zachvorvańnie moža nie mieć jarka vyražanych simptomaŭ. (Tut treba adznačyć, što isnujuć dźvie raznavidnaści niemačy: insult hiemarahičny i insult išemičny. Samastojna razabracca ŭ tym, ź jakoj mienavita formaj insultu daviałosia sustrecca, ciažka. Dy i nie treba — na heta jość śpiecyjalisty.) Pieršyja etapy insultu (a heta nie chviliny, a hadziny i navat sutki) časta prachodziać biez bolevych adčuvańniaŭ. Moža zdranćvieć ruka abo ščaka, źlohku źmianicca mova, časam źjaŭlajecca hałavakružeńnie. Ale takija simptomy mała kaho ŭstryvožać nastolki, kab vyklikać "chutkuju". U vyniku ŭpuskajecca kaštoŭny čas, a potym śpiecyjalistam značna ciažej aktyŭna (a hałoŭnaje, efiektyŭna) umiašacca ŭ praces chvaroby.

Insult — heta mienavita praces, ad niaznačnych funkcyjanalnych źmien da nieabaračalnaha paškodžańnia mozha. Z pačatku raźvićcia chvaroby ŭ miedykaŭ jość tolki niekalki hadzin, kali adekvatnaja terapija moža źmienšyć pamiery paražeńnia i palepšyć zychod zachvorvańnia. Bolšaść miedykaŭ abmiažoŭvajuć ramki takoha "akna terapieŭtyčnych mahčymaściaŭ" usiaho TRYMA hadzinami. Mienavita ŭ hetyja try hadziny treba paśpieć zrabić usio mahčymaje, kab chvory apynuŭsia ŭ liku tych ščaśliŭčykaŭ, chto zmoh pieražyć insult ź minimalnymi nastupstvami.

Jak ža nie ŭpuścić momanty, jakija mohuć kaštavać žyćcia?

Pa-pieršaje, treba pastaracca abjektyŭna acanić stan chvoraha: ci jość asimietryja tvaru (zdranćvieńnie adnaho boku), ci prykmietnyja jakija-niebudź parušeńni movy abo adčuvańnie słabaści ŭ adnoj ruce. Pry najaŭnaści hetych simptomaŭ treba terminova telefanavać u "chutkuju dapamohu".

Pa-druhoje, da pryjezdu miedykaŭ nieabchodna zabiaśpiečyć chvoramu pravilny dohlad: pakłaści na śpinu, pad hałavu — maleńkuju padušku, pry hetym šyja nie pavinna zhinacca, kab nie pahoršyć kryvatok pa pazvanočnych arteryjach. Adčynicie akno, kab pastupała śviežaje pavietra, pierakanajciesia ŭ prachodnaści dychalnych šlachoŭ (heta asabliva važna, kali chvory biez prytomnaści). Abaviazkova dastańcie z rota (kali jość) zdymnyja zubnyja pratezy. Vymierajcie chvoramu cisk. Kali jon pavyšany — dajcie hipatenziŭnyja preparaty, jakimi čałaviek zvyčajna karystaŭsia.

Pa-treciaje, zychod zachvorvańnia šmat u čym zaležyć ad pieršaj dapamohi, jakuju akažuć chvoramu. Tamu pa pryjeździe ŭ balnicu nastojvajcie na praviadzieńni ŭsich nieabchodnych prafiłaktyčnych pracedur i bolš chutkaha pryznačeńnia piarvičnaha lačeńnia.

I jašče adna važnaja parada dla tych, čyje blizkija patrapili ŭ biadu — pieražyli insult. Nie ŭpadajcie ŭ paniku! Vaš pazityŭny nastroj i viera ŭ lepšaje stanuć asnovaj emacyjnaj i duchoŭnaj padtrymki, takoj nieabchodnaj chvoramu.

Try asnoŭnyja pryjomy raspaznavańnia insultu

na miescy, tak zvanyja "UZP"

Paprasicie paciarpiełaha:

U — uśmichnucca. Pry insulcie ŭśmieška moža być kryvaja (vuhałok vusnaŭ z adnaho boku nakiravany ŭniz, a nie ŭvierch).

Z — zahavaryć. Vymavić prosty skaz, naprykład: "Za aknom śviecić sonca". Pry insulcie časta (ale nie zaŭsiody!) nazirajecca parušeńnie vymaŭleńnia (ci nierazumieńnie maŭleńnia).

P — padniać abiedźvie ruki. Kali ruki padymajucca nie adnolkava — heta moža być prykmietaj insultu.

• 0
• 0
• 0
• 0
• 0
• 0
• 0
• 0