Andrej Sańnikaŭ: Moj asnoŭny kankurent — Łukašenka

Kandydat Andrej Sańnikaŭ źjaviŭsia la Centrvybarkamu ranicaj u piatnicu. Jaho supravadžali były kiraŭnik Biełarusi Stanisłaŭ Šuškievič, staršynia minskaj haradskoj arhanizacyi Partyi BNF Viktar Ivaškievič, paplečniki pa «Jeŭrapiejskaj Biełarusi» Uładzimir Kobiec, Źmicier Bandarenka, Jaŭhien Afnahiel.

Usie ŭ strohich kaściumach z halštukami. Šuškievič zaznačyŭ, što padtrymaŭ Sańnikava, bo heta samy mocny kandydat z tych, što jość. «Daśviedčany, adukavany, intelihientny», — skazaŭ Stanisłaŭ Stanisłavavič.

A voś pra astatnich kandydataŭ jon vykazaŭsia nie lepšym čynam. «Kali čałaviek za svajo žyćcio nie stvaryŭ nivodnaha pracoŭnaha miesca, a zaraz abiacaje stvaryć miljon, to mnie heta śmiešna, — ukoł ubok Ramančuka. A voś pra stasunki z Rasijaj Šuškievič skazaŭ. — Rasija bolš nie budzie padtrymlivać hetaje ciemrašalstva ŭ Biełarusi. Rasija idzie da pravavoj dziaržavy».

Sam Sańnikaŭ skazaŭ, što ŭ jaho vydatny nastroj. I sto tysiač podpisaŭ dla kamandy kandydata nie stanuć ciažkaj prablemaj. «Ludzi chočuć pieramienaŭ», — kaža palityk. Ahułam u jaho inicyjatyŭnuju hrupu zapisałasia 1831 čałaviek.

Chtości z žurnalistaŭ nieaściarožna skazaŭ, što hałoŭny kankurent Sańnikava Alaksandr Milinkievič užo źniaŭsia z vybaraŭ, na što kandydat adreahavaŭ imhnienna: «Moj asnoŭny kankurent — Łukašenka».

Andrej Sańnikaŭ zaznačyŭ, što jahonaja kampanija projdzie pad łozunhami «Za narmalnuju Biełaruś». «My idziem u palityčnuju kampanii pa źmiaščeńni Łukašenki z pasady. My pavinny źmianić uładu», — ličyć A.Sańnikaŭ.

***

Nahadajem, što padača dakumientaŭ u CVK na rehistracyju inicyjatyŭnych hrupaŭ skančajecca siońnia, a 19-j. Dakumienty ad 15 vieraśnia padali pradprymalnik Viktar Ciareščanka, kiraŭnik kampanii «Havary praŭdu» Uładzimir Niaklajeŭ, sanitarka sanatoryja «Čonki» (Homielski rajon) Natalla Starykava, pradprymalnik Uładzimir Pravalski, namieśnik staršyni AHP Jarasłaŭ Ramančuk, pieršy namieśnik staršyni Biełaruskaja partyja «Zialonych» Jury Hłušakoŭ, kiraŭnik siektara źniešnieekanamičnaj dziejnaści Viciebskaha płodaaharodninaha kambinata Siarhiej Ryžoŭ.

***

Čakajecca, što siońnia dakumienty padaduć kiraŭnik sajuza «Za madernizacyju» Aleś Michalevič, sustaršynia arhkamiteta pa stvareńni BCHD Vital Rymašeŭski, namieśnik staršyni partyi BNF Ryhor Kastusioŭ, staršynia ŁDP Siarhiej Hajdukievič, trochrazovy prezident Biełarusi, jaki pojdzie za čaćviertym tytułam Alaksandr Łukašenka, a taksama biespracoŭny ź Minska Siarhiej Ivanoŭ.

• 0
• 0
• 0
• 0
• 0
• 0
• 0
• 0