U Litvie prapanujuć padoŭžyć nacyjanalnyja sankcyi suprać rasiejcaŭ i biełarusaŭ da 2028 hoda
Pry hetym razmova nie idzie pra novyja abmiežavańni.
U suviazi z praciaham rasijskaj vajny va Ukrainie, Ministerstva zamiežnych spraŭ Litvy prapanuje padoŭžyć nacyjanalnyja sankcyi suprać hramadzian Rasii i Biełarusi da 2028 hoda, paviedamlaje LRT.
«My prapanujem padoŭžyć termin dziejańnia zakona i abmiežavalnych mier, praduhledzieŭšy padaŭžeńnie nie na adzin hod, a da 31 śniežnia 2027 hoda. Takaja prapanova nie supiarečyła b pryncypu praparcyjanalnaści i tamu faktu, što abmiežavalnyja miery źjaŭlajucca časovymi i padlahajuć pierahladu», — havorycca ŭ tłumačalnaj zapiscy da prajekta.
Da hetaha času Siejm padaŭžaŭ abmiežavalnyja miery dla hramadzian Rasii i Biełarusi terminam na adzin hod. Termin dziejańnia mier, padoŭžanych u minułym hodzie, skančvajecca 2 maja 2026 hoda.
Pavodle źviestak MZS, padaŭžeńnie zakona zabiaśpiečyć Litvie mahčymaść u suviazi z vajnoj Rasii suprać Ukrainy dadatkova, naroŭni z sankcyjami ES, prymianiać na nacyjanalnym uzroŭni abmiežavalnyja miery ŭ dačynieńni da dziaržaŭ-ahresaraŭ u jakaści instrumienta źniešniaj palityki.
Taksama rašeńniem Urada možna budzie zamarožvać hrašovyja srodki i ekanamičnyja resursy, a taksama prymianiać siektarnyja abmiežavańni, kali miery, ustanoŭlenyja na ŭzroŭni ES u dačynieńni da Rasii ci Biełarusi, pierastanuć dziejničać abo buduć admienieny.
Pry hetym MZS nie prapanuje ŭvodzić novyja abmiežavańni.
«Kompleks abmiežavalnych mier, vyznačany zakonam, aceńvajecca jak aptymalny i zbałansavany; pierad tvaram isnujučych pahroz hetyja miery nieabchodnyja i metazhodnyja, prymianiajucca vyklučna jak reakcyja na biahučyja pahrozy, i ich prymianieńnie nie stvoryć niazručnaściaŭ dla žycharoŭ Litvy», — śćviardžajecca ŭ dakumiencie.
Pry štohadovym padaŭžeńni nacyjanalnych sankcyj bolš za ŭsio dyskusij u parłamiencie ŭźnikaje z-za taho, što dla hramadzian Rasii i Biełarusi praduhledžany roznyja abmiežavalnyja miery. Častka palitykaŭ prapanuje ich unifikavać, adnak bolšaść členaŭ Siejma vyrašali inakš.
Asnoŭnyja pałažeńni zakona:
-
Zajavy hramadzian Rasii i Biełarusi na vydaču jak nacyjanalnych, tak i šenhienskich viz bolš nie prymajucca (za vyklučeńniem vypadkaŭ pry pasiarednictvie MZS).
-
Rasijanam bolš nie vydajucca dazvoły na žycharstva ŭ Litvie, za vyklučeńniem vypadkaŭ, kali jany ŭžo majuć dziejnuju vizu abo DNŽ krainy ES.
-
U dačynieńni da hramadzian Rasii (i z acenkaj ryzyk dla hramadzian Biełarusi) prymianiajecca indyvidualnaja dadatkovaja detalnaja pravierka pry ŭjeździe.
-
Bolš nie prymajucca zajavy na status elektronnaha rezidenta Litvy (akramia tych, chto ŭžo maje DNŽ).
-
Rasijanam biez DNŽ zabaroniena nabyvać nieruchomaść.
-
Zabaronieny ŭvoz i vyvaz najaŭnych hrošaj — ukrainskich hryŭniaŭ, a taksama impart sielskahaspadarčych praduktaŭ i karmoŭ z Rasii ci Biełarusi.
-
Hramadzianie Rasii pazbaviacca časovaha DNŽ, kali na praciahu apošnich troch kalandarnych miesiacaŭ bolš za adzin raz adpraviacca ŭ Rasiju ci Biełaruś (vyklučeńnie — pieravozčyki i abjektyŭnyja pryčyny).
Kamientary