Zamarozku terminaŭ vydačy DNŽ u Polščy chočuć pradoŭžyć da sakavika 2027 hoda
Heta vynikaje z prajekta zakona, jaki pavinien pryjści na źmienu dziejnym normam ab dapamozie ŭkrainskim uciekačam. Niahledziačy na nazvu, jon zakranaje i inšych zamiežnikaŭ, piša Most.
Spravy ab DNŽ i inšych lehalizacyjnych pracedurach pa-raniejšamu buduć razhladacca, i rašeńni pa ich praciahnuć vynosić. Ale dziaržaŭnyja orhany nie buduć abaviazany ŭkładacca va ŭstalavanyja terminy. Faktyčna heta raściahvaje lehalizacyjnyja pracedury na nieabmiežavany čas. Takaja praktyka prymianiajecca apošnija hady i stvaraje prablemy dla mnohich zamiežnikaŭ, jakija žyvuć u Polščy. Pry hetym praz zamarozku terminaŭ dziaržaŭnyja orhany (užondy) nielha pryciahnuć da adkaznaści za zatrymku razhladu spraŭ.
Paśla pačatku vajny va Ukrainie ŭ Polščy byŭ raspracavany zakon ab padtrymcy ŭciekačoŭ. Zatym padobnyja dakumienty prymalisia kožnyja paŭhoda, praciahvajučy asnoŭnyja punkty pieršapačatkovaj normy. Adna ź mier — zamarozka terminaŭ razhladu spraŭ ab DNŽ — zakranała nie tolki ŭkraincaŭ, a ŭsich zamiežnikaŭ. Heta tłumačyłasia vialikaj nahruzkaj na dziaržaŭnyja orhany z-za płyni ŭkrainskich hramadzian.
Apošni raz zakon ab uciekačach byŭ padpisany ŭ vieraśni 2025 hoda, i jaho pałažeńni achoplivajuć pieryjad da 4 sakavika 2026 hoda. Užo ŭ vieraśni zakon prymali sa składanaściu: prezident pahadziŭsia padpisać tolki druhuju, źmienienuju viersiju. I tady Karal Naŭrocki papiaredžvaŭ, što dalej zakon padaŭžać nie buduć. Mnohija spadziavalisia, što, adpaviedna, paśla 4 sakavika 2026 hoda terminy razhladu spraŭ ab DNŽ buduć «razmarožanyja».
Zaraz urad pracuje nad tym, jak buduć admienienyja punkty zakona ab dapamozie ŭkrainskim uciekačam. Heta budzie apisana ŭ adpaviednym zakonaprajekcie. Na sajcie kancylaryi premjer-ministra pryviedzieny asnoŭnyja pałažeńni novaha dakumienta.
Ź ich vynikaje, što terminy spraŭ, źviazanyja z pražyvańniem zamiežnikaŭ, chočuć prypynić da 4 sakavika 2027 hoda, to bok jašče na hod.
Ale adnačasova ŭ apublikavanaj infarmacyi pryvodzicca punkt ab pradaŭžeńni terminaŭ dziejańnia dazvołaŭ i inšych dakumientaŭ da toj ža daty — 4 sakavika 2027 hoda. Jak budzie realizavana hetaja miera, pakul składana acanić. Ale kali praktyka budzie takaja ž, jak padčas epidemii COVID, heta budzie aznačać pradaŭžeńnie lehalnaha statusu zamiežnikaŭ, navat kali termin dziejańnia ich DNŽ skončycca.
Ciapier čytajuć
«Kab Biełaruś nie addali Pucinu ŭ jakaści suciašalnaha pryza». Cichanoŭskaja zaklikaje ŭklučyć biełaruskaje pytańnie ŭ mirnyja pieramovy Ukrainy i Rasii3434
Kamientary