U Varšavie asudžany na pažyćciovaje zabojca biełaruski Lizy padaŭ apielacyju
Sud u Varšavie 28 kastryčnika razhledzić apielacyju pavodle spravy zabojcy biełaruski Lizy Hiercen. U studzieni Daryjan S. byŭ asudžany na pažyćciovaje źniavoleńnie za zhvałtavańnie i zabojstva, adnak abarona padała apielacyju.
Sud razhladaje apielacyju Daryjana S., pakolki abarona sprabuje davieści, što abvinavačvany byŭ niedastatkova staranna daśledavany na pradmiet najaŭnaści śviadomaści, a praces nibyta prajšoŭ zanadta chutka — prysud byŭ vyniesieny mienš čym praz hod paśla zabojstva, piša «Biełsat».
Pry vyniasieńni prysudu ŭ studzieni 2025 hoda sud pryjšoŭ da vysnovy, što Daryjan S. dziejničaŭ spakojna i razvažliva — paśla ździajśnieńnia złačynstva adyšoŭ upeŭniena, zabraŭšy tolki kaštoŭnyja rečy Lizy. Daryjan S. pryznaŭ siabie vinavatym, ale zajaviŭ, što nie chacieŭ zabivać Lizu.
Tym nie mienš, pres-sakratar akruhovaj prakuratury Varšavy Piotr Antoni Skiba paviedamiŭ «Biełsatu» paśla suda ŭ studzieni, što vyrak Akruhovaha suda Varšavy nie kančatkovy: «Kali budzie padadzienaja apielacyja, to prysud stanie kančatkovym paśla taho, jak apielacyja budzie razhledžanaja, a vyšejšy sud zaćvierdzić prysud».
Napad na biełarusku Lizu adbyŭsia ŭ centry Varšavy ŭ noč na 25 lutaha 2024 hoda. Daryjan S. paćvierdziŭ viersiju śledstva — jon zhvałciŭ dziaŭčynu i sprabavaŭ jaje zadušyć. Zatym jon prosta kinuŭ Lizu biez prytomnaści na vulicy, zabraŭšy jaje bankaŭskija kartki i telefon.
Ranicaj dziaŭčynu znajšoŭ vartaŭnik, jaki vyklikaŭ chutkuju dapamohu i palicyju. Lizu špitalizavali ŭ krytyčnym stanie, praz šeść dzion jana pamierła.
Amal adrazu paśla napadu byŭ zatrymany Daryjan S., jakomu na toj momant było 23 hady.
U jahonaj kvatery znajšli bałakłavu i nož, jakija vykarystoŭvalisia pry napadzie na Lizu, a taksama skradzienyja ŭ jaje rečy.
Kamientary