U Paryžy pačaŭsia sud nad ludźmi, jakija śćviardžali, što žonka prezidenta Francyi Bryžyt Makron — transhiendar

Akramia taho, padsudnyja, vosiem mužčyn i dźvie žančyny va ŭzroście ad 41 da 65 hadoŭ, abvinavačvajucca ŭ paklopnickich vykazvańniach adnosna 24‑hadovaj roźnicy va ŭzroście pamiž 72‑hadovaj Bryžyt i 47‑hadovym Makronam.

Jak paviedamlaje AFP sa spasyłkaj na advakata Bryžyt Makron, jana adsutničała na pieršym pasiedžańni i nie płanuje źjaŭlacca ŭ sudzie. U aŭtorak, mahčyma, pakazańni daść jaje dačka, Cifani Oźje.

Siarod 10 padsudnych — čynoŭnik na vybarnaj pasadzie, uładalnik halerei, nastaŭnik i internet-ekstrasens, 51‑hadovaja Delfin Ž., jakaja vystupaje ŭ internecie pad nikam Amandzin Rua.

Razam ź inšaj padsudnaj, Natašaj Rej, jakaja nazyvaje siabie niezaležnaj žurnalistkaj, u minułym hodzie jana ŭžo była asudžana za paklop na Bryžyt Makron.

U 2021 hodzie Amandzin Rua apublikavała ŭ YouTube razmovu z Natašaj Rej, u jakoj jany śćviardžali, što nijakaj Bryžyt Makron pieršapačatkova nie isnavała, a nasamreč heta jaje brat, Žan-Mišel Trońjo, jaki źmianiŭ poł.

Adnak zatym Rej i Rua vyjhrali apielacyju, i Bryžyt Makron razam z bratam abskardžvajuć hetaje rašeńnie apielacyjnaha suda.

Kanśpirałahičnyja plotki adnosna taho, što Bryžyt Makron — transhiendar, cyrkulujuć z 2017 hoda, z taho času, jak jaje muž staŭ prezidentam Francyi.

Hetyja ni na čym nie zasnavanyja śćviardžeńni stali adnosna papularnyja i ŭ peŭnych kołach u ZŠA — tam ich raspaŭsiudžvała ŭ asnoŭnym influensier pravaha tołku Kendzis Oŭens.

Minułym letam siamiejnaja para Makronaŭ padała pazoŭ suprać Oŭens, zajaviŭšy, što taja ihnaruje ŭsie dokazy niepraŭdzivaści hetych śćviardžeńniaŭ i praciahvaje pradastaŭlać trybunu kanśpirołaham i paklopnikam, jakija zajaŭlajuć hetyja rečy pra madam Makron.

Emanuel Makron kazaŭ, što, padaŭšy pazoŭ suprać Oŭens, jon abaraniaje svoj honar, a Oŭens, «słužačy svaim idejam i majučy viadomyja suviazi z pravaradykalnymi lidarami», naŭmysna raspaŭsiudžvaje chłuśniu, žadajučy pryčynić jamu škodu.

Adzin ź dziesiaci padsudnych u Paryžy, Areljan Puarson-Atłan, vydaviec pa rodu zaniatkaŭ, viadomy ŭ sacsietkach pad nikam «Zoe Sagan» i časta abvinavačvajecca ŭ raspaŭsiudžvańni teoryj zmovy, zajaviŭ u paniadziełak padčas pierapynku ŭ sudzie, što jon z pamahatymi padviarhajecca «zvarotnamu ckavańniu».

Jaho padtrymaŭ inšy padsudny, uładalnik halerei Biertran S., jaki maje 100 tysiač fołavieraŭ u sietcy X.

«Presa pakazvaje nas pravaradykałami, antysiemitami, kanśpirołahami. I kaho tut ckujuć?» — zajaviŭ jon ahienctvu AFP.

Bryžyt Makron sustreła svajho budučaha muža jašče školnikam, u škole, dzie jana była nastaŭnicaj. Jany pažanilisia ŭ 2007 hodzie, kali Emanuelu było 29 hadoŭ, a Bryžyt — 54 hady.

• 1
• 0
• 0
• 5
• 0
• 0
• 0
• 0