U Minsku admianili tankavy fiestyval ad Lesta na 9 Maja. A abiacali «miehapadzieju»
U sakaviku ŭładalnik «Lesta ihry» anansavaŭ vialiki ŭdzieł kampanii ŭ minskich uračystaściach da 80-hodździa Pieramohi ŭ Vialikaj Ajčynnaj vajnie. Ale jon admienieny, piša Devby.io. Heta zdaryłasia paśla abviaščeńnia «Lesty» ekstremisckaj u Rasii.
U intervju kanału ANT, jakoje vyjšła ŭ kancy sakavika, kiraŭnik kampanii «Lesta ihry» Malik Chatažajeŭ anansavaŭ «miehapadzieju», jakaja rychtujecca ŭ Minsku da 80-hodździa Pieramohi. I zaprasiŭ usich na Niamihu 10 maja.
— My płanujem miehapadzieju, — skazaŭ Chatažajeŭ. — Zaraz, napeŭna, rana pra jaje havaryć, chutka ŭsio prahučyć. <…> 10 maja na Niamizie budzie vialikaje haradskoje śviata, pryśviečanaje 80-hodździu. Tam budzie kibiersport, vystup artystaŭ. My ŭ im biarom udzieł. Heta budzie vialikaja haradskaja padzieja. Prychodźcie — budzie kruta.
Jon taksama padkreśliŭ, što padrychtoŭka da jubileju idzie ŭžo hod, i kampanija vykładvajecca «na poŭnuju», budzie «kuča ŭsiaho», u tym liku «šykarny parad».
U kancy krasavika źjavilisia padrabiaznaści pra ŭdzieł «Lesty» ŭ haradskim siamiejnym fiestyvali «Naša pieramoha» 10 maja. Sajt WOT Express (naviny «Śvietu tankaŭ» i World of Tanks) apublikavaŭ buklet z abaznačeńniem zon aktyŭnaściaŭ «Lesty» kala Pałaca sportu. Siarod ich — siłamier, baskietboł, cir, chułachup, pałasa pieraškod. A jašče — mierč «Śvietu tankaŭ», zona vydačy ŭznaharod, zona Q&A. Zaraz publikacyja supravadžajecca abnaŭleńniem: «Tankavy fiestyval admianiajecca».
Hałoŭnaj padziejaj tankavaha fiestyvalu (a ŭdzieł «Lesty» sajt nazvaŭ mienavita tak) byŭ zapłanavany finał «Kubka Biełarusi» — kibierspartyŭnaha turniru z pryzavym fondam 50 tysiač BYN, jaki pačaŭsia anłajn jašče 14 krasavika. Zaraz na aficyjnym sajcie hulni World of Tanks, na staroncy «Kubka Biełarusi» staić takaja płaška.
Pry hetym, chto ciapier arhanizatar — niezrazumieła.
A na staroncy «Śvietu tankaŭ» u VK na pačatku maja źjaviłasia abjava pra pieranos finału «Kubka Biełarusi» «na bolš poźni pieryjad pa techničnych pryčynach». I navat pra admienu siamiejnaha fiestyvalu.
Miž tym, siamiejny fiestyval usio ž adbudziecca. Jon jość u prahramie Minharvykankama, praŭda ŭ anonsie ničoha nie havorycca pra «Śviet tankaŭ»:
«U subotu, 10 maja, z 12 da 23 hadzin na placoŭcy kala Pałaca sportu na praśpiekcie Pieramožcaŭ adbudziecca siamiejnaje śviata «Naša Pieramoha». Tut projduć kancerty, budzie pracavać palavaja kuchnia. Minabarony padrychtavała vystavu sučasnaj vajennaj techniki».
A voś jak piša pra fiestyval «Kamsamolskaja praŭda»:
«10 maja na placoŭcy kala Pałaca Sportu z 12.00 da 23.00 adbudziecca siamiejny fiestyval «Naša pieramoha». Buduć pracavać fudkorty. Akramia taho, raźmieścicca i vialiki kirmaš padarunkaŭ ručnoj raboty «Harošak-markiet». Haściam fiestyvalu prapanujuć šmat aktyŭnaściaŭ. Taksama buduć pracavać łakacyi chakiejnaha kłuba «Dynama-Minsk», raznastajnyja vystavy i mnohaje inšaje. A 15.00 pačniecca maštabny kancert, u jakim prymuć udzieł papularnyja biełaruskija i rasijskija artysty. Chedłajnieram śviata stanie śpiavak Niletto».
Čytač devby, znajomy z arhanizacyjaj tankavaha śviata, napisaŭ, što ŭsie mierapryjemstvy z udziełam «Lesty» byli admienieny pa rašeńni dziaržaŭnaha zakazčyka «paśla navin z RF».
Nahadajem, u kancy krasavika Hienprakuratura Rasii paprasiła sud zabaranić dziejnaść u krainie «ekstremisckaha abjadnańnia», jakoje, pavodle viersii viedamstva, składajecca z uładalnika rasijskaj kampanii «Lesta Ihry» Malika Chatažajeva i ŭładalnika Wargaming.net Viktara Kisłaha. Viedamstva taksama zapatrabavała kanfiskavać na karyść dziaržavy 100% dolaŭ u statutnym kapitale «Lesta Ihry», a mienavita troch jaje TAA: «Lesta», «Lesta Hiejms Edžensi» i «Lesta Hiejms Maskva». Troški raniej stała viadoma, što na aktyvy jurydyčnych asob nakładzieny aryšt. Padobna, rasijskuju kampaniju padazrajuć u suviazi z Wargaming i dapamozie USU.
Ciapier čytajuć
Ułady Hrodna paviedamili pra vychad z ładu liŭnioŭki pad udaram stychii1
Kamientary
I tut intieriesno, ministru prikazali ili zabašlali nakanunie ariesta aktivov?