Rasijanie rasstralali biełarusa, jaki admoviŭsia iści na «miasny šturm» va Ukrainie
Da vierbavańnia ŭ šerahi rasijskaj armii Pavieł Hłuchaŭ adbyvaŭ pakarańnie za zabojstva ŭ papraŭčaj kałonii № 7 va Udmurtyi.
Uradženiec Biełarusi Pavieł Hłuchaŭ byŭ rasstralany za admovu iści ŭ «miasny šturm» u składzie rasijskich vojskaŭ, vierahodna, u Danieckaj vobłaści Ukrainy, paviedamili «Radyjo Svaboda» va ŭkrainskim prajekcie «Chaču žyć».
Pavodle infarmacyi prajekta, Pavieł Hłuchaŭ naradziŭsia 8 červienia 1985 hoda ŭ Biełarusi, u vioscy Źviazda (taki nasieleny punkt jość adrazu ŭ niekalkich rajonach Biełarusi. — RS). Jon padpisaŭ kantrakt na słužbu ŭ vajskovaj častcy 95378 pałka 1437, asobnyja padraździaleńni jakoha kamplektujuć z zavierbavannych źniavolenych u rasijskich turmach i kałonijach.
Pavodle źviestak ukrainskaha prajekta, da vierbavańnia Pavieł Hłuchaŭ adbyvaŭ pakarańnie za zabojstva ŭ papraŭčaj kałonii № 7 va Udmurtyi: jaho asudzili pavodle č. 1 artykuła 105 Kryminalnaha kodeksa Rasii. Dakładna nieviadoma, jakoje hramadzianstva jon mieŭ na momant padpisańnia kantraktu.
Połk 1437 rasijskaj armii viadomy tym, što jaho vajskoŭcaŭ vykarystoŭvajuć u tak zvanych «miasnych šturmach» dla praryvu ŭkrainskich pazicyj. Časta jany nie majuć adpaviednaha vajskovaha ryštunku i iduć u boj niepadrychtavanymi, a kali sprabujuć adstupić na raniejšyja pazicyi, ich rasstrelvajuć svaje ž vajskoŭcy.
Rasijskija vajskoŭcy, jakim udałosia vyžyć i trapić va ŭkrainski pałon, raskazvali pra žorstkaje abychodžańnie ŭ hetym pałku z tymi, chto admaŭlaŭsia iści ŭ šturmy. Jość niekalki vypadkaŭ, kali takich vajskoŭcaŭ kidali «ŭ jamu». Pra takija šturmy raniej raskazvali dva biełarusy — Siarhiej Šustaŭ, jaki trapiŭ va ŭkrainski pałon pad Tareckam u Danieckaj vobłaści, i Andrej Łapatnioŭ. Baćki vajskoŭcaŭ hetaha padraździaleńnia rasijskaj armii nieadnarazova źviartalisia da prezidenta Rasii Uładzimira Pucina, kab jon źviarnuŭ uvahu na situacyju ŭ hetym pałku i «pryniaŭ miery».
U pryvatnaści, maci adnaho z takich vajskoŭcaŭ — Nadzieja Piatroŭna Lebiedzieva — navat stvaryli adpaviednuju pietycyju, ale jana sabrała niašmat podpisaŭ.
«Situacyja ŭ tym, što ŭ hetaj častcy sałdat adpraŭlali na śmierć, na «miasa», jak ślapych kacianiat. U vyniku bajoŭ na pakroŭskim kirunku, vierahodna kala Piatroŭki i Višnioŭki, z 10 listapada da pačatku śniežnia 2024 hoda biez ahniavoj padtrymki i naležnaha zabieśpiačeńnia, biez artyleryi i h.d. zahinuli praktyčna ŭsie vajskoŭcy, a mienavita 1 i 2 rota. Zastałosia žyvymi kala 20 z 400 čałaviek, u tym liku i moj syn. Pavodle słoŭ syna, pakolki na kirujučy skład zaviali kryminalnyja spravy, śviedkaŭ, jakija zastalisia, płanavali «abnulić» (rasstralać. — RS), i jany vymušanyja byli chavacca ŭ biaśpiečnych miescach», — adznačajecca ŭ zvarocie da Pucina.
Kamientary
Dyk nie začyniŭ akazvajecca? RS pracuje?
Kacianiat ślapych škoda, hetych - nie. Nichto ich nie zmušaŭ- šli na vajnu z metaj zabivać inšych, pamierli sami.
[Zredahavana]
"Medyjakarparacyja «čakaje aficyjnaha paćvierdžańnia ad USAGM ab adnaŭleńni hrantavaha finansavańnia», ale hetaha pakul nie adbyłosia. Adpaviedna, kampanija nia maje naležnych srodkaŭ dla paŭnavartasnaj pracy.
Z hetaj pryčyny my vymušanyja adpravić častku našaj redakcyi ŭ adpačynak. Adpaviedna, bližejšym časam publikacyjaŭ na našych platformach stanie prykmietna mienš. Niekatoryja z našych znakavych prajektaŭ — «PiK Svabody» na YouTube-kanale «Svaboda Premium» ci «Tłumačym z Hurnievičam» na YouTube-kanale Radyjo Svaboda, videapadkasty «Historyja na Svabodzie» i «Kudy kocicca śviet» — stanuć na vymušanuju paŭzu."
[Zredahavana]