Daktary zaklikajuć bajkieraŭ abaraniać nie tolki hałavu: redki vypadak vyvichu jaječka
Aŭstralijskija ŭrołahi apisali vyklučny vypadak: paśla avaryi na matacykle ŭ maładoha mužčyny jaječka vyskačyła z mašonki i apynułasia pad skuraj, prosta kala hałoŭki pałavoha člena.
Kali my čujem słova «vyvich», to zvyčajna dumajem pra kalena ci plačo; niechta moža zhadać, što takoje zdarajecca i z kryštalikam voka. Ale pahadziciesia, mała chto adrazu padumaje pra vyvich jaječka. Tym nie mienš, takoje zdarajecca, kali jaječka anamalna pieramiaščajecca za miežy mašonki. Heta moža adbycca jak z adnym, tak i z abodvuma jaječkami ŭ vyniku traŭmy.
Jak piša Le Monde, u 80 % viadomych vypadkaŭ heta zdarajecca z matacyklistami.
Historyju 29-hadovaha aŭstralijca, jaki trapiŭ u matacykletnuju avaryju, daktary apisali ŭ svaim artykule ŭ časopisie Urology Case Reports.
Mužčyna atrymaŭ zakrytuju traŭmu nižniaj častki žyvata i vobłaści taza. U špitali jon byŭ u prytomnaści i skardziŭsia na bol u vobłaści hienitalij. Kliničnaje abśledavańnie vyjaviła vyvich pravaha jaječka.
Paśla mocnaha ŭdaru jaječka całkam vyskačyła z mašonki, padniałosia pad skuru nižniaha boku pałavoha člena, prabiła jaje źvierchu i apynułasia zvonku — prosta pad hałoŭkaj. Pry hetym jano ŭsio jašče zastavałasia złučanym z mašonkaj z dapamohaj nasiennaha kanacika.
Levaje jaječka zastavałasia na miescy. Akramia hetaha, mužčyna atrymaŭ niekalki ciažkich traŭmaŭ: pierałom siomaha rabra, hiematomu sielazionki, pierałom łučavoj kostki levaj ruki i levaha ściahna. Jaho terminova adpravili na apieracyju. Chirurhi-ŭrołahi viarnuli vyvichnutaje jaječka na miesca.
Asablivaść hetaha vypadku ŭ tym, što vyvich jaječka vielmi redka pryvodzić da jaho vychadu vonki pad upłyvam udaru. Zvyčajna jaječka pry takich traŭmach pieramiaščajecca ŭ pachvinnuju abo brušnuju vobłaść praz pachvinny kanał.
Byvaje, što jaječka padymajecca ŭvierch pa pienisie. Taki vypadak byŭ apisany ŭ 2024 hodzie ŭ Journal of International Medical Research: u 20-hadovaha kitajca, jaki taksama trapiŭ u avaryju na matacykle, pravaje jaječka ŭtvarała šyšku (2,5 × 3 × 4 sm) pad skuraj pienisa sprava. Pry sutyknieńni mašonka ŭdaryłasia ab bienzabak matacykła, i jaječka było vykinuta ź jaje.
Jak adznačajuć śpiecyjalisty, traŭmatyčny vyvich jaječak — źjava redkaja. Na siońnia viadoma kala 200 takich vypadkaŭ va ŭsim śviecie. Pieršy byŭ zafiksavany jašče ŭ 1818 hodzie, kali koła voza ścisnuła nižniuju častku žyvata paciarpiełaha.
Siońnia 80% vypadkaŭ źviazanyja mienavita z matacykletnymi avaryjami. Bienzabak — sapraŭdny vorah mašonki: pry ŭdary jon pieradaje mocny impuls u vobłaść pachu, i kali adnačasova skaračajucca myšcy, jakija padymajuć jaječki, to heta moža pryvieści da ich vychadu z mašonki.
Pavodle statystyki, u pałovie vypadkaŭ jaječka apynajecca ŭ pachvinie, u 18% — u vobłaści łabka, u 8% — pad skuraj pienisa, u 4% — u pramiežnaści, u 2% — u vierchniaj častcy ściahna. Radyus pieramiaščeńnia vyznačajecca daŭžynioj nasiennaha kanacika.
U 2013 hodzie ŭrołahi i artapiedy z Hrenobla apisali niezvyčajny vypadak vyvichu jaječka ŭ spałučeńni z składanaj traŭmaj taza. Padčas apieracyi jany vyjavili, što pravaje jaječka znachodziłasia ŭ pachvinna-mašonačnym kanale, a levaje — unutry taza, pad pramoj myšcaj žyvata, jakaja farmiruje piaredniuju ścienku brušnoj połaści.
Amal u kožnym trecim vypadku vyvich adbyvajecca adrazu z dvuma jaječkami. Redka jon supravadžajecca zakručvańniem nasiennaha kanacika. Hałoŭny sihnał — pustaja mašonka. Mienavita tamu pry luboj surjoznaj traŭmie taza ci pachviny daktary pavinny abaviazkova ahladać źniešnija pałavyja orhany.
Čym chutčej likvidavać prablemu, tym vyšej šaniec zachavać funkcyju. Časam atrymlivajecca ŭručnuju viarnuć jaječka na miesca (pad narkozam i z vykarystańniem rassłablalnych preparataŭ), ale heta pracuje tolki ŭ 15% vypadkaŭ. Čaściej za ŭsio patrabujecca apieracyja. Pry hetym važna nie paškodzić hiemata-testykularny barjer — svojeasablivy imunny ščyt jaječka. Inakš mahčyma raźvićcio aŭtaimunnaj reakcyi, što moža pryvieści da biaspłodnaści.
Vysnova adna: matacykły niebiaśpiečnyja nie tolki dla kaściej. Niezaŭvažanaja traŭma mašonki moža mieć surjoznyja nastupstvy. Jak śviedčać daktary, byli vypadki, kali tolki praź niekalki miesiacaŭ paśla avaryi jany vypadkova vyjaŭlali «vandroŭnaje» jaječka. Poźniaja dyjahnostyka — heta ryzyka niekrozu, biaspłodnaści i niezvarotnych uskładnieńniaŭ.
Tak što, mužčyny, bieražycie nie tolki hałavu, ale i… usio astatniaje. Asabliva na matacykle.
Kamientary