11 piesień-zaklonaŭ — u Anastasii Rydleŭskaj vyjšaŭ novy albom na troch movach
Snake Charmer (Zaklinalnica źmiej) — treci poŭnafarmatny albom biełaruskaj mastački i muzyki Anastasii Rydleŭskaj. 11 piesień-zaklonaŭ, pry dapamozie jakich jana prachodzić šlach pryniaćcia siabie i składanaściaŭ navakolnaha śvietu.
Albom hučyć na troch movach — biełaruskaj, anhlijskaj i francuzskaj.
Jaho atmaśfiera vahajecca ad bchanhra-padobnaj manifiestacyi Dance On My Own, jakaja ŭžo stała narodnym chitom śpiavački, da viazkich, nuarnych Petit Oiseau, Kachaju i Isolde; ad letuciennych Limerence i Collarbones da estradnaj Scorpio Moon. Zaviaršaje albom žyvatvornaja kałychanka Home, zdolnaja abahreć i padtrymać zranienuju dušu stomlenaha samuraja ci amazonki.
«Hety albom — sproba pazbavicca ad kompleksaŭ, strachaŭ, bolu i traŭmaŭ, jakija ja nazapasiła za žyćcio, — raspaviadaje Anastasija. — Jany niby chałodnyja źmiei prylipali da cieła i chavalisia ŭnutry. U albomie ja ščyra raskazvaju pra strach być saboj, žadańnie być zručnaj, padabacca ŭsim, žyć cicha i akuratna, kab nie patryvožyć hetych źmiej. Ale ja zrazumieła: jany ŭsio roŭna ŭkusiać, a žyćcio projdzie.
Hety albom — nie pra baraćbu ź imi, a pra inšy šlach. Pra toje, jak praz muzyku, kachańnie, pryniaćcie svajoj seksualnaści i sapraŭdnych žadańniaŭ možna pastupova pryručyć svaich unutranych źmiej. Pra śmiełaść być saboj, navat kali hetaja viersija niajomkaja dla inšych. I tady źmiei, jakich ty bajałasia, jakich bajalisia inšyja, stanoviacca tvaimi siabrami. Bo kali ty razumieješ, navošta jany tut, jany pierastajuć być atrutnymi».
Na pieśniu Petit Oiseau u artystki niadaŭna taksama vyjšaŭ klip.
12 krasavika Nastaśsia prezientuje svoj albom u Hdańsku na fiestyvali Sea You Music Showcase, a 20 krasavika ŭ Varšavie adbudziecca jaje solny kancert.
Anastasija Rydleŭskaja pačała zapisvać ułasnuju muzyku ŭ 2023 hodzie. Za karotki čas jana vypuściła dva albomy — When I Can't Speak (2023) i Mugwort (2023). Jaje tvorčaść vyłučaje ŭnikalnaje spałučeńnie biełaruskich pahanskich karanioŭ, navatarskaj elektroniki i šmatsłojnych miełodyj.
Aproč muzyčnaj dziejnaści, Anastasija źjaŭlajecca viadomaj vizualnaj mastačkaj, jakaja ŭdzielničała ŭ piersanalnych i hrupavych vystavach u Polščy, Hiermanii, Francyi, Ispanii, Litvie i Šviejcaryi.
«Kali ciapier chierova, značyć, heta jašče nie kaniec». Pahutaryli z epatažnym «śviatarom XXI stahodździa», pra jakoha nie było čuvać piać hadoŭ paśla aryštu
Kamientary