Interjer adnaho z vučebnych kłasaŭ kaledža ŭ Babrujsku adroźnivajecca niezvyčajnym afarmleńniem.
Fotazdymki niezvyčajnaha kłasa apublikavali ŭ sacsietkach. Cełuju ścianu kampjutarnaha kłasa ŭ Babrujskim dziaržaŭnym kaledžy imia A. Ja. Łaryna zajmaje draŭlanaja dekaratyŭnaja panel.
Panel była zroblena ŭ 1980-ja navučencami tady jašče mastackaha prafiesijna-techničnaha vučylišča №15 pad kiraŭnictvam Anatola Koncuba. Koncub, bolš viadomy svaimi pracami ŭ kieramicy, pačaŭ vykładać va ŭstanovie adrazu paśla skančeńnia Biełaruskaha teatralna-mastackaha instytuta ŭ 1971 hodzie.
Panel aformlena raźboj, čatyry fihury simvalizujuć roznyja vidy mastactva i ramiastva. Paŭkruhłyja zaviaršeńni miedaljonaŭ stvarajuć iluziju arkady, jakaja nibyta adkryvaje vid na znakamityja krajavidy.
Hetyja miedaljony, try vialikija i vosiem małych, — hałoŭnaja admietnaść paneli. U ich źmieščany malavanyja vyjavy viadomych pomnikaŭ architektury z roznych častak śvietu.
Siarod hałoŭnych miedaljonaŭ centralnaje miesca zajmaje vyjava Kižskaha pahosta na Aniežskim voziery ŭ Rasii, jaki składajecca ź dźviuch cerkvaŭ i zvanicy XVIII—XIX stahodździaŭ.
Sprava ad jaho miedaljon z vyjavaj Rejmskaha sabora XIII stahodździa, viaršyniaj francuzskaj hotyki. U hetym sabory karanavalisia amal usie manarchi Francyi.
Źleva źmieščany jašče adzin pomnik hotyki, ale ŭžo biełaruskaj — abarončaja Synkavickaja carkva, pabudavanaja ŭ pačatku XVI stahodździa. Praŭda, heta adziny pomnik architektury Biełarusi, jaki atrymaŭ miesca na paneli — pałova małych miedaljonaŭ pryśviečana architektury Rasii.
Siarod rasijskich pomnikaŭ tut namalavanyja carkva Pakrova na Nierli va Uładzimiraŭskaj vobłaści, sabor Pakrova, što na Rvu (Sabor Vasila Błažennaha) i maŭzalej Lenina na Krasnaj płoščy ŭ Maskvie, a taksama Isakijeŭski sabor u Leninhradzie.
Z suśvietnych słavutaściaŭ dla paneli ŭ kaledžy vybrany sabor Śviatoha Piatra ŭ Rymie, akropal u Afinach, maŭzalej-miačeć Tadž-Machał i Rakfieleraŭski centr u Ńju-Jorku.
Hetaja mastackaja panel choć i robić kampjutarny kłas kaledža adroznym ad tysiač inšych, ale moža jak šmat jakaja savieckaja dekaratyŭnaja spadčyna cicha źniknuć pad naciskam jeŭraramontu. Vidavočcy adznačajuć, što anałahičnyja tvory, stvoranyja dla muziejaŭ u kaledžy, užo biasśledna źnikli.
«Naša Niva» — bastyjon biełaruščyny
PADTRYMAĆ
Były pamočnik Łukašenki Ihar Bryło pryznaŭ, što nabraŭ chabaraŭ na $2 miljony10
Kamientary
...
i heta dziva dziŭnaje... što znajšłosia miesta biełaruskamu pomniku siarod takoj...
lapaty