Minčuk pastaviŭ na kuchni turystyčnuju pałatku, kab vyroščvać kanopli
Jaho padviała šumnaja kampanija, na jakuju susiedzi vyklikali milicyju.
U staličnuju milicyju pastupiła całkam standartnaja skarha na šum u susiedziaŭ. Prybyŭšy na miesca, supracoŭniki PPS adčuli dziŭny pach z kvatery, dzie hulała šumnaja kampanija. Milicyjaniery vyrašyli ahledzieć pamiaškańnie.
Na kuchni siłaviki ŭbačyli vystaŭlenuju turystyčnuju pałatku, abstalavanuju pad boks dla vyroščvańnia kanoplaŭ. Supracoŭniki narkakantrolu, jakija prybyli paźniej, kanfiskavali bolš za 600 hramaŭ vysušanaj marychuany, 2 raśliny kanoplaŭ i ŭsio nieabchodnaje dla jaje vyroščvańnia.
41-hadovy haspadar kvatery patłumačyŭ, što vyroščvaŭ travu dla ŭłasnaha ŭžyvańnia. Raniej jon nie traplaŭ u pole zroku siłavikoŭ.
Na mužčynu zaviali kryminalnuju spravu pa padazreńni ŭ niezakonnym abaračeńni narkotykaŭ.
Kamientary