U Łos-Andželesie, dzie tydzień zmahajucca z pažarami, čakajuć urahanny viecier. Zhareła jak pałova Minska
Piać pažarnych bryhad praciahvajuć zmahacca z ahniom u rajonach Łos-Andželesa, sprabujučy spravicca z dvuma bujnymi i dvuma mienšymi lasnymi pažarami na poŭdni Kalifornii, piša Radyjo Svaboda
Kolkaść zahinułych u vyniku pažaraŭ, jakija pačalisia roŭna tydzień tamu, za apošnija sutki nie źmianiłasia i składaje 24 čałavieki. Źnikłymi bieź viestak ličacca, pavodle apošnich źviestak, 23 čałavieki.
Sinoptyki dajuć niesuciašalnyja prahnozy pa vietry na bližejšy čas. Pavodle ich infarmacyi, paryvy mohuć dasiahać 113 kiłamietraŭ u hadzinu, što stvaraje ryzyku novych uzharańniaŭ. Mer Łos-Andželesa Karen Bas zajaviła, što viecier, pa prahnozach, «budzie blizki da ŭzroŭniu ŭrahanu», u suviazi z čym ułady prymajuć ekstranyja miery reahavańnia.
Samy bujny lasny pažar u rajonie Pasifik-Palisejds achapiŭ bolš za 90 kvadratnych kiłamietraŭ. Supracoŭnikam ekstranych słužbaŭ udajecca ŭtrymlivać pad kantrolem tolki 14% pierymietra pažaru.
Infarmacyja pra źnikłych bieź viestak pastupiła z zon uździejańnia pažaraŭ «Palisejds» i «Itan». Dla 90 tysiač miascovych žycharoŭ zachoŭvajecca ŭ sile rasparadžeńnie ab evakuacyi z-za ciapierašniaha biedstva.
Prezident ZŠA Džo Bajden u paniadziełak na bryfinhu z pradstaŭnikami ekstranych słužbaŭ zajaviŭ, što adnaŭleńnie paśla pažaraŭ, jakija za tydzień pieratvaryli niekatoryja rajony Łos-Andželesa ŭ tlejučyja ruiny, abydziecca ŭ «dziasiatki miljardaŭ dołaraŭ».
Bajden vykazaŭ hłybokija spačuvańni achviaram razburalnych lasnych pažaraŭ. Jon nazvaŭ straty vielizarnymi.
«Našy sercy razryvajucca za 24 nievinavatyja dušy, jakija my stracili. Džył i ja molimsia za ich i ich blizkich», — skazaŭ prezident ZŠA.
Kiraŭnik Biełaha doma zapeŭniŭ, što jaho administracyja ŭvažliva sočyć za situacyjaj.
«Ja rehularna atrymlivaju zvodki ab mierach pa tušeńni hetych pažaraŭ i daŭ ukazańnie svajoj kamandzie apieratyŭna reahavać na lubyja zapyty ab dadatkovaj fiederalnaj dapamozie», — pryvodzić słovy Bajdena «Hołas Amieryki».
Ahulnaja płošča vyharałaj ziamli składaje bolš za 39 000 akraŭ — pryblizna ŭ 2,5 raza bolš, čym Mancheten (kala 140 kv kiłamietraŭ).
Bolšaść achviar prypadaje na pažar u Itan-Kańjonie. Pažar u Pasifik-Palisejds, jak adznačajecca, zabraŭ vosiem žyćciaŭ.
Na poŭdni Kalifornii, dzie znachodzicca Łos-Andželes, z maja vypała ŭsiaho 2,5 milimietra apadkaŭ. Praz pavyšeńnie tempieratury i skaračeńnia apadkaŭ, źviazanych z klimatyčnymi źmienami, siezon pažaraŭ u rehijonie pačynajecca ŭsio raniej i zakančvajecca ŭsio paźniej, nabližajučysia da kruhłahadovaha, adznačaje Asacyjacyja pažarnych.
Byłoha vajskoŭca z Bresta, jaki viarnuŭsia z Polščy, abvinavacili ŭ «teraryźmie» i adpravili ŭ kałoniju6
Kamientary