Sańnikaŭ: Kali ŭsie palitviaźni buduć vyzvalenyja, ja budu pieršym, chto skaža, kab zdymali ŭsie sankcyi

— U Biełarusi pavinny prajści prezidenckija vybary ŭ studzieni 2025 hoda. Čamu, na vaš pohlad, režym Łukašenki nadumaŭ pryznačyć ich raniej za termin?

— Niama ni «hałasavańnia», ni «vybaraŭ», i maja parada — ihnaravać heta, bo paśla 2020 hoda demakratyčny śviet naohuł nie pavinien vykarystoŭvać słova «vybary» ŭ dačynieńni da hetaha režymu. Dumaju, u Łukašenki jość peŭnyja nadziei, źviazanyja z novaj administracyjaj ZŠA, tamu jon śpiecyjalna pryznačyŭ hety śpiektakl adrazu paśla inaŭhuracyi novaha prezidenta ZŠA. Ale navat nazyvać heta «vybarami» ŭ dvukośsi — heta nie prosta pamyłka, a złačynstva suprać palitviaźniaŭ u Biełarusi.

— Ci dumajecie vy, što hety fars z vybarami i ŭvaha da Biełarusi mohuć stvaryć impuls na mižnarodnaj arenie dla ŭviadzieńnia novych ci bolš metanakiravanych sankcyj?

— Ja spadziajusia, što buduć uviedzienyja realnyja sankcyi suprać režymu, bo heta adziny sposab vyratavać žyćci ludziej.

Kali ŭsie palitviaźni buduć vyzvalenyja, ja budu pieršym, chto skaža: zdymajcie ŭsie sankcyi. Napierad. Zabudźciesia pra majo admoŭnaje staŭleńnie da Łukašenki. Kali ŭsich vyzvalać, zdymajcie sankcyi, rabicie, što chočacie. Ale treba niešta rabić, tamu što hety drobny dyktatar vykarystoŭvaje situacyju z vajnoj va Ukrainie, kali ŭvaha ŭsich zasiarodžana na inšym, dla źniščeńnia ludziej. A na Zachadzie zakłapočanyja nie raźviazvańniem prablem, a vykazvańniem zaniepakojenaści, što nijak nie dapamahaje.

— Vy skazali, što kali palitviaźni buduć vyzvalenyja, vy budziecie pieršym, chto skaža źniać sankcyi. Heta tamu, što vy miarkujecie, što ich vyzvalać tolki ŭ vypadku, kali Łukašenka bolš nie budzie va ŭładzie?

— Nie, ja kažu heta tamu, što chaču, kab niešta było zroblena dla vyratavańnia čałaviečaha žyćcia. Heta pryjarytet. Pa-druhoje, sapraŭdnyja lidary apazicyi siońnia znachodziacca ŭ turmie, a nie na svabodzie. Tyja, chto byli la vytokaŭ našaj revalucyi ŭ 2020 hodzie, usie ŭ turmie: Cichanoŭski, Statkievič, Sieviaryniec, Šarenda-Panasiuk i šmat inšych. Voś čamu ja dumaju, što kali ŭsich ich vyzvalać, situacyja ŭ Biełarusi źmienicca.

I ja nie kažu, što heta možna zrabić tolki ŭ vypadku, kali Łukašenka nie budzie va ŭładzie. Łukašenka surjozna chvory, heta vidavočna. Jon moža źniknuć u kožny momant, i tady, što my budziem mieć? Nieadkładnuju reakcyju Kramla, bo jany nie zachočuć stračvać Biełaruś i jaje stratehičnuju terytoryju. Adziny sposab dla Rasii praciahnuć svaju vajnu — heta zachavać Biełaruś u svaim aljansie. Kali my pazbavimsia režymu Łukašenki i zrobim hetuju terytoryju spačatku niejtralnaj, a paśla častkaj Jeŭropy, vajny nie budzie. Rasija nie zmoža hetaha zrabić, bo, kali pahladzieć na kartu, stanovicca vidavočna, što hety «biełaruski bałkon», jaki navisaje nad Jeŭropaj, — adzinaja častka Jeŭropy, jakaja realna pahražaje joj. I pakolki Ukraina ŭžo ruchajecca ŭ bok NATO i Jeŭrasajuza, Biełaruś — klučavaja kropka.

• 5
• 1
• 0
• 3
• 0
• 0
• 0
• 0