Pavodle infarmacyi Fłahštoka, pad čarhovy «chapun» u kancy kastryčnika — pačatku listapada trapili dziasiatki ludziej. Žurnalisty nie nazyvajuć proźviščy, kab nie davać padstavy dla jašče bolšych represij.
Bolšaść zatrymanych — heta byłyja aktyvisty, tyja, chto choć niejak udzielničaŭ u pratestach 2020 hoda i raniej, chacia apošnim časam nie prajaŭlaŭ nijakaj aktyŭnaści — što ŭ pryncypie niemahčyma ŭ siońniašnich umovach u Biełarusi.
Niekatoryja z zatrymanych padvierhnutyja kryminalnamu pieraśledu, ale asnoŭnaja častka na dadzieny momant adpraŭlenaja za kraty dla adbyćcia administracyjnaha aryštu za «padpiski». Pry hetym viadomyja vypadki, kali siłaviki sami padpisvali zatrymanych na kanały, zaniesienyja ŭ «ekstremiscki» śpis — na padstavie hetaha ludziej asudžali na sutki. Pry hetym u raskład suda pracesy nad imi nie ŭnosili, kab schavać maštab represij.
Adzin z byłych homielskich palityčnych źniavolenych raskazaŭ Fłahštoku ab viadomych vypadkach.
Siarod niadaŭna zatrymanych jość siamiejnaja para: muž adbyŭ termin u kałonii za ŭdzieł u pratestach 2020 hoda, a jaho žonka — administracyjny aryšt. Na dniach ich, u jakich jość maleńkaje dzicia, znoŭ zatrymali, abvinavačańnie pakul nieviadoma.
Inšy surazmoŭca, jaki paśla 2020 hoda straciŭ pracu na homielskim dziaržaŭnym pradpryjemstvie, daviedaŭsia, što niadaŭna da jaho prychodziła milicyja, pakul jaho nie było doma. Zaraz jon žyvie ŭ čakańni mahčymaha aryštu.
Na nastupny tydzień pryznačany šerah sudoŭ za «padpiski», niekatoryja ŭklučany ŭ raskład, tamu my možam pra ich raskazać.
Naprykład, u sudzie Centralnaha rajona Homiela 11 listapada buduć razhladać jak minimum čatyry takija spravy. Usie pracesy prajduć nie ŭ budynku suda, a prosta ŭ milicyi — u RAUS Centralnaha rajona na Hałavackaha, 135. U apošni čas heta stała raspaŭsiudžanaj praktykaj. Niekalki sudoŭ pryznačany na adzin i toj ža čas, da jakoha zatrymanych pryvoziać u RAUS i pa čarzie sudziać.
Siarod tych, čyje spravy buduć razhladać 11 listapada — Alaksandra Łazarenka, čyje danyja supadajuć z proźviščam i imiem viadomaj hramadzianskaj aktyvistki (nie palityčnaj). Heta vypusknica Jeŭrapiejskaha humanitarnaha ŭniviersiteta, art-mieniedžar, viadučaja adukacyjnych prahram dla dziaciej i darosłych, kaardynatar vałanciorskaha dabračynnaha prajekta OpShop. Jana była ŭ kamandzie novaha adukacyjnaha prajekta dla moładzi ab biźniesie, jaki hetym letam startavaŭ u Žłobinie.
Zaraz Alaksandry staviać u vinu try razy adzin i toj ža artykuł KoAP — 19.11 č. 2 «Raspaŭsiud, vyrab, zachoŭvańnie, pieravozka infarmacyjnaj pradukcyi, jakaja źmiaščaje zakliki da ekstremisckaj dziejnaści abo prapahanduje takuju dziejnaść».
Pra što maŭčyć Alaksiej Franckievič, jakomu Polšča zakryła ŭjezd na 10 hadoŭ67
Kamientary