Raniej Łukašenka havaryŭ inšaje — što nibyta jon nie trymajecca za ŭładu sinimi palcami.
Łukašenka siońnia pravodzić naradu pa vybarach. Jon zajaviŭ, što vysnovy z 2020 hoda zrobleny: «uładu rastapyranymi rukami nie trymajuć».
«Usie pavinny razumieć, što my ŭžo spraktykavalisia za hetyja hady i razumiejem, što ŭładu rastapyranymi rukami nie trymajuć. I my nie źbirajemsia heta rabić. My vysnovy z 2020 hoda zrabili. Tamu budziem dziejničać tak, jak heta patrebna našaj krainie i našamu narodu», — skazaŭ jon.
Jon adznačyŭ, što hałoŭnaj dziejučaj asobaj u vybarčy pieryjad źjaŭlajecca kiraŭnik CVK i jamu nieabchodna akazać nieabchodnuju dapamohu i padtrymku.
«Ja prašu aryjentavacca na jaho. Usio, što jon paprosić, my pavinny dapamahčy. Ale tam, dzie nie treba ŭmiešvacca, nie treba biehčy napieradzie paravoza. U hetym niama nijakaj nieabchodnaści. Mienš buduć nas paprakać faktyčna, što my tam umiešvajemsia ŭ niejkija vybary», — skazaŭ jon.
Łukašenka ličyć, što ŭ krainie mahčymyja pravakacyi, tamu nielha rassłablacca: «chapaje ŭ hramadstvie roznych ludziej».
«Što tyčycca pravakacyj – infarmacyjnych, palityčnych i inšych — mahčymyja. Jany byli, jość i buduć.
Prosta nie treba rassłablacca: «Ach, u nas hramadstva takoje — hetyja admarožanyja samyja, jany źbiehli i inšaje…» Chapaje ŭ hramadstvie roznych ludziej. I rassłablacca tut nikomu ni ŭ jakim razie nie treba. Asabliva nam — orhanam ułady na miescach. Treba zychodzić z horšaha varyjantu. Budzie lepš — nu i dobra», — kaža jon.
Cikava, što kali ciapier Łukašenka kaža, što ŭładu rastapyranymi palcami nie trymajuć, to raniej jon havaryŭ inšaje — što nibyta jon nie trymajecca za ŭładu sinimi palcami.
Tak, u 2019 hodzie jon prakamientavaŭ namier bałatavacca na vybarach kiraŭnika dziaržavy ŭ 2020 i 2025 hadach. Tady jon padkreśliŭ, što nie trymajecca za hetu pasadu.
«Ja svaju kandydaturu prapanuju na hetych [2020 hoda] vybarach. Ale kali budu adčuvać, što vy kateharyčna suprać, viadoma, budu pieražyvać, ale tym nie mienš vy pavinny maju kandydaturu adkinuć na vybarach. I ja paabiacaŭ, što sinimi palcami za kresła trymacca nie budu. Paviercie, heta nie zusim miakkaje kresła», — zapeŭniŭ jon.
Žurnalisty tady ž, u 2019 hodzie, pacikavilisia, ci maje namier Łukašenka brać udzieł u prezidenckich vybarach paśla 2020 hoda, naprykład, u 2025-m.
«Hospadzi, ja, moža, da 2025 hoda nie dažyvu, nie daj boh», — adkazaŭ jon.
Pra što maŭčyć Alaksiej Franckievič, jakomu Polšča zakryła ŭjezd na 10 hadoŭ67
Kamientary
Za vłasť on hotov był ubivať i ubivał užie mnoho let nazad.
2020 był markierom, čtob vyviesti naturu naružu.