Rasijskaja hłybinka: žančynie dali 13 hadoŭ za padpał vajenkamata. Dva jaje syny siadziać, treci na vajnie, čaćviorty ŭ prytułku

Aŭtary vyśvietlili, što Kaciaryna pachodzić ź siamji, dzie było šaściora dziaciej. Paśla vaśmi kłasaŭ škoły jana pastupiła ŭ PTV i atrymała śpiecyjalnaści kucharki. Rana vyjšła zamuž, u 18 hadoŭ naradziła pieršaha syna Dźmitryja. U chutkim časie muž jaje kinuŭ.

Žančyna vyjšła druhi raz zamuž i pierajechała razam z mužam u pasiołak Burapałom u Nižaharodskaj vobłaści. U pasiołku trochi bolš za try tysiačy žycharoŭ. Asnoŭnymi miescami pracy źjaŭlajucca čyhunka i kałonija, jakaja znachodzicca pobač.

Paśla pierajezdu Kaciaryna naradziła druhoha syna Mikitu, a praź niekalki hadoŭ raźviałasia z mužam. Trecim jaje mužam staŭ adzin z mužčyn, što adbyŭ pakarańnie ŭ kałonii. Jon byŭ na 15 hadoŭ za jaje starejšym. U pary naradziłasia jašče dva syny — Maksim i Ihar.

Pavialičyć

U 2020 hodzie treci muž pamior (u jaho byli prablemy z sercam), i Kaciaryna zastałasia adna z dvuma niepaŭnaletnimi synami. Niezadoŭha da svajoj śmierci muž atrymaŭ ordar na novuju kvateru, kudy siamja paśla sudovych ciažbaŭ (miascovaja administracyja ličyła, što ni ŭdava, ni dzieci nie majuć prava na kvateru) pierasialiłasia z baraku.

Miascovyja žychary raskazali, što Kaciaryna złoŭžyvała ałkaholem, ale kali ŭłady zabrali jaje małodšaha syna, zakadziravałasia. Pry hetym jana aficyjna nidzie nie pracavała, žyła na srodki ad piensii, što pryznačyli ŭłady paśla śmierci muža. Taksama hrošy dasyłaŭ druhi syn žančyny — Mikita. Jon skončyŭ Razanskaje vajenna-kamandnaje vučylišča i ź lutaha 2022 hoda vajuje va Ukrainie. Jak vyśvietlili žurnalisty, mužčyna prymaŭ udzieł u bajavych dziejańniach u Bučy i Hastomieli.

Pavialičyć

Pa słovach syna Kaciaryny Maksima, jaho maci padmanuli machlary. Dla pahašeńnia doŭhu Kaciarynu prymusili ŭziać kredyty i pieravieści hrošy na peŭny rachunak. Paźniej vyśvietliłasia, što jon byŭ ukrainskim.

Paśla hetaha machlary stali šantažyravać žančynu, što paviedamiać u pravaachoŭnyja orhany ab jaje pieravodzie i jana patrapić za kraty, a jaje treciaha syna Maksima zabiaruć na vajnu.

Kab hetaha nie adbyłosia, čałaviek, jaki joj zvaniŭ i pradstaviŭsia supracoŭnikam FSB, prapanavaŭ kinuć kaktejl Mołatava ŭ budynak miascovaha vajenkamata i zapisać hety akt na videa. Padpał, pa jaho słovach, dapamoža vyjavić zdradnikaŭ u šerahach rabotnikaŭ vajenkamata, a jaje paśla aficyjnaha dopytu adpuściać dachaty i zabuduć pra pieravod hrošaj.

Žančyna zrabiła heta razam z synam Maksimam, jaki nie zachacieŭ jaje adpuskać adnu, 15 listapada 2023 hoda.

Ich zatrymali adrazu na mieście złačynstva. Pa słovach śviedak, Kaciaryna ŭmolvała palicejskich źviarnuć uvahu na tranślacyju, jakuju jana viadzie dla «supracoŭnika FSB», i sprabavała dać im zrazumieć, što ŭsio adbyvajecca pad kantrolem śpiecsłužbaŭ.

U lipieni 2024 hoda pa spravie ab terakcie sud prysudziŭ maci 13 hadoŭ kałonii, a synu, jaki na momant ździajśnieńnia złačynstva byŭ niepaŭnaletnim, 4,5 hoda kałonii.

U źniavoleńni znachodzicca i starejšy syn žančyny Dźmitryj. Jašče ŭ 2016 hodzie jon byŭ asudžany na 14 hadoŭ za razboj i naŭmysnaje pryčynieńnie ciažkich cialesnych paškodžańniaŭ, jakija pryviali da śmierci čałavieka. Z prysudu vynikaje, što Dźmitryj razam ź siabram pjanymi ŭvarvalisia ŭ kvateru da miascovaha žychara, patrabavali hrošaj, žorstka jaho źbili za admovu i katavali prasam.

Małodšamu synu Kaciaryny Babajevaj ciapier 8 hadoŭ, i jon znachodzicca ŭ prytułku, u jakim užo kaliści byŭ, kali jaho zabirali ad maci, jakaja piła. Niahledziačy na toje, što ŭ Kaciaryny jość rodnyja braty i siostry, nichto ź ich nie zachacieŭ zabrać chłopčyka sabie. Jaho čakaje dziciačy dom.

• 1
• 0
• 13
• 16
• 3
• 7
• 0
• 0