Novaja kanśpirałohija ad błohiera Virusa: jon razabraŭsia, čamu Łukašenka nie pasadziŭ samalot ź Cichanoŭskaj
Błohier śćviardžaje, što Cichanoŭskuju nie čapali, kab paśla vypadku z Pratasievičam jana prałabiravała zakryćcio nieba nad Biełaruśsiu dla hramadzianskaj avijacyi.
Učora «Naša Niva» apublikavała vialiki artykuł pra błohiera Vitala Kandracienku — «Chto taki kanśpirołah Virus, jaki štodnia abražaje i plažyć biełaruski demakratyčny ruch?» Pad artykułam bahataje abmierkavańnie — užo bolš za 70 raznastajnych kamientaroŭ.
A Vital Kandracienka, nie adychodziačy ad kasy, siońnia prapanavaŭ novuju kanśpirałahičnuju teoryju — jak i zvyčajna, z poŭnaj adsutnaściu faktčekinhu.
«Pamiatajecie samalot, pasadžany z Ramanam Pratasievičam u 2021 hodzie? Na dzień raniej na hetym ža rejsie lacieli Cichanoŭskaja i Viačorka, ale pavietrany pirat Łukašenka vyrašyŭ: «a navošta nam hetaja Cichanoŭskaja, Pratasievič važniejšy». Dyk što heta było?» — piša błohier i prychodzić da vysnovy, što situacyja była vyhadnaja vyklučna Rasii.
Maŭlaŭ, Cichanoŭskuju nie čapali, kab paśla vypadku z Pratasievičam jana prałabiravała zakryćcio nieba nad Biełaruśsiu dla hramadzianskaj avijacyi. A dla čaho heta było patrebna? Kali b nie zakryli nieba ŭ 2021 hodzie, to ŭ 2022 zachodnija avijakampanii zasudzili b Łukašenku za toje, što z terytoryi Biełarusi palacieli b bomby pa Ukrainie, pierakonvaje Virus.
Ale elemientarny internet-pošuk pakazvaje, što rejs Ryanair nie lataje z Afinaŭ u Vilniu kožny dzień. Pieraloty ažyciaŭlajucca dvojčy na tydzień. Tak było tady, tak jość i ciapier. Tamu «na dzień raniej» Cichanoŭskaja lacieć nie mahła nijak.
Lidarka demakratyčnych siłaŭ nasamreč była ŭ Hrecyi — jaje vizit ździajśniaŭsia z 12 pa 14 maja 2021 hoda. Ale płan, na jakim rejsie viartacca, źmianiŭsia ŭ apošni momant.
«Ja lacieła dakładna takim ža rejsam tydzień tamu. I nasamreč, mahčyma, nie trapiła infarmacyja nakont majho pieralotu, tamu što ja musiła vylacieć napiaredadni, ale samalot užo na ŭźlocie rezka spyniŭsia z-za niejkich niepaładak i nam daviałosia terminova šukać nastupny rejs na Vilniu. I heta byŭ najbližejšy. I vielmi chutka adbyłasia pierarehistracyja. Mahčyma, nie zaŭvažyli», — tłumačyła Cichanoŭskaja.
(Tekst byŭ udakładnieny).
Kamientary