Žurnalistam zahadali spynić kradziež suvieniraŭ sa słužbovaha samalota Bajdena
Pravierka invientara samalota Džo Bajdena paśla vizitu prezidenta ZŠA na zachodniaje ŭźbiarežža krainy ŭ lutym vyjaviła, što ŭ adździele dla presy adsutničajuć niekalki pradmietaŭ. Siarod pradmietaŭ, jakija nibyta źnikli z samalota, — firmovyja navałački, šklanki i talerki ŭ załatoj apravie, piša Bi-bi-si.
Asacyjacyja karespandentaŭ Biełaha doma papiaredziła, što brać rečy z samalota zabaroniena. U minułym miesiacy asacyjacyja nakiravała elektronny list žurnalistam, u jakim paviedamiła, što takija pavodziny drenna adbivajucca na pres-pule — hrupie žurnalistaŭ, jakija jeduć z prezidentam, — a tamu pavinny spynicca.
Žurnalistam časam na pamiać dorać nievialikija ŭpakoŭki cukierak M&Ms, upryhožanyja prezidenckaj piačatkaj. Ale ŭ toj ža čas i brać pradmiety z łahatypam Air Force One — u tym liku stałovyja prybory i ručniki — było zvyčajnaj spravaj na praciahu mnohich hadoŭ, śćviardžajecca ŭ spravazdačach.
Samalot Air Force One («Bort numar adzin»), jaki Bieły dom nazyvaje «ofisam prezidenta ŭ niebie», maje płošču ŭ 372 kvadratnych mietraŭ, raźmieščanuju na troch uzroŭniach. Hetyja pamiaškańni ŭklučajuć u siabie vialiki luks dla prezidenta, miedycynski punkt z apieracyjnym stałom, kanfierenc-zału i stałovuju, dva kambuzy dla hatavańnia ježy, jakija mohuć nakarmić 100 čałaviek adnačasova, a taksama śpiecyjalnyja zony dla presy, VIP-pierson, achovy i sakratara.
Dziakujučy pieradavoj avijonicy i abaronie, samalot kłasifikujecca jak vajskovy samalot, pryznačany dla supraćstajańnia pavietranamu napadu. Jon taksama zdolny zapraŭlacca ŭ pavietry, što dazvalaje jamu lotać nieabmiežavany čas — heta vielmi važna ŭ nadzvyčajnaj situacyi.
Air Force One taksama zabiaśpiečany abstalavańniem biaśpiečnaj suviazi, što dazvalaje samalotu funkcyjanavać u jakaści mabilnaha kamandnaha centra. Na borcie majecca 85 telefonnych aparataŭ, kamplekty radyjostancyj i kampjuternych złučeńniaŭ.
Prezident padčas palotu siadzić napieradzie, a žurnalisty raźmiaščajucca ŭ zadniaj častcy samalota.
Ciapier čytajuć
Žonka ahienta-kachanka Anžaliki Mielnikavaj źviazanaja z arhanizacyjaj Ruskaja madel efiektyŭnaha spakušeńnia14
Kamientary