Pra śmierć hałoŭnaha rasijskaha apazicyjaniera paviedamiła Upraŭleńnie pa vykanańni pakarańniaŭ Jamała-Nienieckaj aŭtanomnaj akruhi. Navalnamu było 47 hadoŭ.
«Asudžany Navalny A.A. paśla prahułki adčuŭ siabie drenna, praktyčna adrazu straciŭšy prytomnaść. Nieadkładna prybyli miedycynskija rabotniki ŭstanovy, była vyklikana bryhada chutkaj miedycynskaj dapamohi. Praviedzieny ŭsie nieabchodnyja reanimacyjnyja mierapryjemstvy, jakija stanoŭčych vynikaŭ nie dali. Uračy chutkaj miedycynskaj dapamohi kanstatavali śmierć asudžanaha», — havorycca ŭ paviedamleńni Upraŭleńnia pa vykanańni pakarańniaŭ pa Jamała-Nienieckaj akruzie.
Pa źviestkach Russia Today, u Navalnaha adarvaŭsia tromb.
Alaksiej Navalny byŭ hałoŭnym apazicyjanieram Rasii. Jaho Fond baraćby z karupcyjaj vypuskaŭ rasśledavańni pra karupcyju ŭ bližejšym atačeńni Pucina, raskazvaŭ pra rezidencyi i jachty samoha Pucina, bahaćcie jaho siamji.
U žniŭni 2020 hoda palityka atrucili «Navičkom». Jon upaŭ u komu. Spačatku Navalny trapiŭ u omskuju balnicu, paśla jaho pieravieźli ŭ Bierlin u kliniku «Šaryte». Navalny zmoh adnavicca. Paśla jaho kamanda vypuściła rasśledavańnie pra toje, jak śpiecsłužby Rasii sprabavali jaho atrucić.
17 studzienia 2021 hoda palityk viarnuŭsia u Maskvu, razumiejučy, što moža być pasadžany. Jaho adrazu aryštavali.
U lutym 2021 hoda umoŭny termin Navalnaha pa spravie «Iŭ Raše» zamianili na realny — i adpravili Alaksieja ŭ kałoniju na 2 hady i 8 miesiacaŭ.
Ale ŭ sakaviku 2022-ha jamu prysudzili 9 hadoŭ pazbaŭleńnia voli ŭ kałonii strohaha režymu pa abvinavačvańniach u machlarstvie ŭ asabliva bujnym pamiery i niepavazie da suda.
Čarhovy sud pa Navalnym byŭ u 2023-m — jamu dali 19 hod u kałonii asobaha režymu pa abvinavačvańniach u stvareńni ekstremisckaj supolnaści, finansavańni ekstremisckaj dziejnaści, zaklikach da ekstremizmu ŭ internecie.
Spačatku palityk znachodziŭsia ŭ PK-6 va Uładzimirskaj vobłaści Rasii. U siaredzinie śniežnia 2023 hoda Navalnaha etapavali ŭ kałoniju «Palarny voŭk» u pasiołku Charp u Jamała-Nienieckaj aŭtanomnaj akruzie. 27 razoŭ palityka adpraŭlali ŭ ŠIZA.
U palityka zastałasia žonka Julija Navalnaja i dvoje dziaciej. Siamja ciapier za miažoj.
Ciapier čytajuć
Biełaruś užo nie tolki pra palitviaźniaŭ. Z čym Śviatłana Cichanoŭskaja pajechała na adzin z hałoŭnych forumaŭ pa biaśpiecy ŭ ZŠA i što tam rabiŭ Siarhiej Cichanoŭski2121
Kamientary