U Šviejcaryi pamior biełarus z pałka «Pahonia». Mierkavana, jaho źbili afrykanskija mihranty
7 studzienia ŭ Šviejcaryi zahinuŭ biełarus Mikałaj Sikorski — vajar, vieteran vajny va Ukrainie. Raskazvajem, što viadoma pra jaho i abstaviny śmierci.
Sikorski pamior ad čerapna-mazhavoj traŭmy. Znajomyja mužčyny paviedamlajuć, što jon atrymaŭ jaje dva miesiacy tamu ad ruk mihrantaŭ z krain Afryki.
Mikałaj naradziŭsia 11 červienia 1972 hoda, to-bok na momant śmierci jamu byŭ 51 hod. Mužčyna rodam z łatvijskaj Jełhavy. U 1992-m, užo ŭ Biełarusi, Mikałaj atrymaŭ sudzimaść.
Spačatku jon nasiŭ proźvišča Kościkaŭ, a ŭ kancy 2000-ch staŭ Sikorskim.
U adnym ź intervju Sikorski raskazvaŭ, što 20 hadoŭ pražyŭ u Hiermanii. Paśla Majdana paznajomiŭsia z dobraachvotnikam Dźmitryjem Šaŭlukievičam i praz heta apynuŭsia ŭ zonie ŭkrainskaj antyterarystyčnaj apieracyi. Heta adbyłosia ŭ 2017 hodzie.
Sikorski kazaŭ u intervju, što žanaty i maje dvuch synoŭ. Razam z rodnymi jon i sustreŭ va Ukrainie pačatak poŭnamaštabnaj vajny, a potym dałučyŭsia da navastvoranaha biełaruskaha pałka «Pahonia». Tłumačyŭ heta tym, što na toj čas jon mieŭ adnolkavyja pohlady sa stvaralnikam «Pahoni» Vadzimam Prakopjevym i dałučyŭsia da pałka «pa zakliku serca».
Z Prakopjevym, miarkujučy pa ŭsim, Sikorski paźniej pasvaryŭsia: u śniežni 2023 hoda, naprykład, jon havaryŭ pra jaho vyklučna jak pra «zdradnika, niahodnika i prosta afierysta». Akramia hetaha, Sikorski krytyčna vykazvaŭsia na svajoj staroncy pra Valeryja Sachaščyka.
Vosieńniu 2022-ha pra Sikorskaha zahavaryli z-za skandału ŭ «Pahoni». Paviedamlałasia, što dva bajcy padraździaleńnia, eks-palitviazień Cichan Klukač i bajec «Karyč», nie zmahli prajści pravierku na palihrafie z SBU i atrymali pastanovy ab departacyi z Ukrainy. Tady Sikorski dapamoh chłopcam zastacca va Ukrainie.
Apošnija paŭhoda mužčyna žyŭ u Šviejcaryi — pakinuŭ Ukrainu praz prablemy sa zdaroŭjem u svajački i praz nastupstvy svajoj kantuzii.
«Naša Niva» — bastyjon biełaruščyny
PADTRYMAĆČytajcie taksama:
Ciapier čytajuć
Aryna Sabalenka vyjšła da minčukoŭ u atačeńni vaśmi achoŭnikaŭ VIDEA13
Kamientary
Za musarku pabilisia? Abo žyźni chatieu navučyť afrykanca?))