Prapahandystka Chudalej, jakaja pracavała na žanočych maršach, zvolniłasia z STB i šukaje pracu ŭ IT
«Zorka» Ksienii Chudalej uzyšła ŭ 2020-m. Jana zdymała prynižalnyja videa z zatrymanymi, a z pačatkam poŭnamaštabnaj vajny va Ukrainie raspaŭsiudžvała rasijskija fejki. Praz pracu na prapahandu navat razyšłasia z chłopcam. Ale hod tamu źnikła z teleekranaŭ. U Linkedin jana saramliva nie piša, što była prapahandystkaj.
Šlach na telebačańnie
Ksienii 25 hadoŭ. Rodam jana z Mahilova, ź siamji prostych rabočych. U škole vučyłasia dobra, a paśla pajechała pastupać u Minsk. Abrała žurfak BDU, śpiecyjalnaść «aŭdyjavizualnaja žurnalistyka».
Na pieršym kursie dziaŭčyna schadziła na praktyku na radyjo, na druhim abrała ANT. A na trecim kursie stała pracavać na STB. Pieršy siužet pad jaje imiem datujecca majem 2018-ha — biełaruskamoŭny repartaž pra krynicu ŭ Dziaržynskim rajonie.
Spačatku dziaŭčyna pracavała z navinami Minskaha rajona, paśla joj pačali daviarać siužety i pra stalicu.
Ksienija prahnuła słavy. Vielmi hanaryłasia, što šmat pracuje. «Nijakaha asabistaha žyćcia, ja prasiadzieła na pracy 12 hadzin, biez vychadnych budu pracavać», — lubiła pachvalicca jana.
«Zorka Chudalej»
U 2020-m Chudalej stała adnym z palityčnych žurnalistaŭ STB. Navat raniej vyjšła z adpačynku, kab uklučycca ŭ paślavybarčuju prapahandu.
«Ničym nie vydzialałasia, siarednieńkaja takaja. Adpracoŭvała raźmierkavańnie, karaciej.
A ŭ 2020-m jaje pačali pasyłać na maršy, jana bolš pracavała pa žanočych. Choć da hetaha jana nie była zaŭvažanaja ŭ jabaćkaŭskaj kahorcie. Za ŭdarnuju pracu Ksieniju pieraviali ŭ prahramu «Naviny 24 hadziny», a paśla jana rabiła aŭtarskuju prahramu — «Pralić śviatło».
Kažuć taksama, što ŭ jaje byli adnosiny, ale praz 2020 hod para razyšłasia. Chłopiec nie acaniŭ jaje pracu na prapahandu», — raspaviadaje były kaleha Ksienii.
Adzin ź minčukoŭ paśla razmovy z Chudalej na prateście patrapiŭ na sutki. Sama Ksienija ŭ repartažy śćviardžała, što na pratestach pieravaročvajuć mašyny.
Chudalej pracavała pa mnohich palityčnych temach — jeździła na sudy nad Viktaram Babarykam, zapisvała prynižalnyja videa z zatrymanymi, rabiła repartažy z maršaŭ.
Źmiest i padača jaje prahramaŭ nie byli niejtralnyja. Cichanoŭskuju jana nazyvała «durnoj», ździekvałasia z zatrymanych, admaŭlała isnavańnie palitviaźniaŭ, kpiła ź biełaruskich nacyjanalnych simvałaŭ.
U studzieni 2022 hoda prapahandystcy abjavili padziaku ad Łukašenki.
Paśla pačatku rasijskaha ŭvarvańnia va Ukrainu ŭ lutym 2022 hoda Chudalej pieraklučyłasia na temu vajny. Dziaŭčyna nazyvała Buču i fakty masavych zabojstvaŭ ukraincaŭ fejkami, pužała łabaratoryjami Pientahona i raspaŭsiudžvała inšuju rasijskuju łuchtu. Tak praciahvałasia da śniežnia 2022-ha.
Apošni repartaž Ksienii na STB vyjšaŭ 31 śniežnia 2022 hoda. Z taho času publična jana nidzie nie śviaciłasia.
Zvalnieńnie z TB i novyja intaresy
Usie sacsietki Ksienii zakrytyja, akramia Linkedin. I tam jość niekalki cikavostak.
Pa-pieršaje, nidzie nie ŭkazana, što Chudalej pracavała ŭ dziaržaŭnych ŚMI. Pa-druhoje, akaŭnt byŭ stvorany ŭ kastryčniku 2022-ha, akurat napiaredadni zvalnieńnia.
Padpisanaja Ksienija na IT-kampanii, BDU i staronku z prapanovami pa addalenaj pracy.
Taksama jana atrymała dva siertyfikaty ad Google — abodva pa rekłamie. Zvyčajna ich atrymlivajuć tyja, chto choča ruchacca ŭ śfieru SMM.
Z čym źviazana zvalnieńnie prapahandystki z STB, nieviadoma. Ale, vyhladaje, sama jana ciapier saramliva chavaje pracu na prapahandu.
«Naša Niva» — bastyjon biełaruščyny
PADTRYMAĆŽurnalistka STB raskazvała, što na pratestach u Biełarusi pieravaročvali mašyny. Što viadoma pra Ksieniju Chudalej?
Žančyna-«antyvandał» vyjšła zamuž za śpiecnazaŭca-jabaćku
«Usie prakładačnyja vysierki». Raskryli, chto viadzie adzin z samych brudnych kanałaŭ łukašysckaj prapahandy
Milicejski telehram-kanał, dzie publikujuć videa z represavanymi, vypadkova vydaŭ svaich adminaŭ
Ciapier čytajuć
«Łukašenka pavinien panieści adkaznaść za saŭdzieł u rasijskaj ahresii». Ministr zamiežnych spraŭ Ukrainy raskazaŭ pra novuju palityku ŭ dačynieńni da Biełarusi2727
Kamientary