Načalnik Hałoŭnaha ŭpraŭleńnia raźviedki Ministerstva abarony Ukrainy Kirył Budanaŭ ličyć, što vajna RF suprać Ukrainy nie budzie doŭhaterminovaj. Pra heta jon skazaŭ na štohadovaj sustrečy «Jałcinskaj jeŭrapiejskaj stratehii», pieradaje «Interfaks-Ukraina».
«Ja nie padzialaju mierkavańnia, što heta budzie praciahłaja vajna. Heta majo asabistaje mierkavańnie, jakoje hruntujecca na analizie tych danych, jakija my majem, pieršym čynam pa supierniku», — skazaŭ jon.
Pavodle jaho słoŭ, rasijanie fizična nie mohuć vieści doŭhaterminovyja dziejańni.
«Ale, znoŭ ža, kali vy kažacie ab paŭhodździ, ab siami miesiacach, ab hodzie, i dumajecie, što heta praciahły termin — to całkam zrazumieła, što vy majecie racyju», — skazaŭ načalnik vajennaj raźviedki.
Adkazvajučy na pytańnie ab pośpiechu ŭkrainskaha kontrnastupleńnia na paŭdniovym uschodzie krainy, Budanaŭ adznačyŭ, što nastup idzie adrazu pa niekalkich kirunkach, i nie tolki tam.
«Jak by ni zdavałasia, nastup praciahvajecca. Idzie nie tak chutka, jak chaciełasia b, ja taksama hetaha nie chavaju», — skazaŭ jon.
Budanaŭ pryznaŭ, što rasiejcy majuć dobra vybudavanuju liniju abarony, «i nie adnu liniju», a taksama majuć vielizarnuju kolkaść pieranosnych supraćtankavych kompleksaŭ.
«Asnoŭnyja prablemy, ź jakimi sutyknulisia, — bieśpierapynnaje miniravańnie i vielizarnaja kolkaść małych bieśpiłotnikaŭ-kamikadze», — skazaŭ kiraŭnik vajennaj vyviedki.
Adkazvajučy na pytańnie ab tym, ci paŭpłyvaje źmianieńnie nadvorja na kontrnastupleńnie, Budanaŭ skazaŭ, što «tak ci inakš bajavyja dziejańni buduć praciahvacca», ale pryznaŭ, što «ŭ maroz, słotu i brud vajavać składaniej».
«Vajennyja dziejańni buduć praciahvacca. Nastupalnaja apieracyja idzie pa ŭsich kirunkach, i, padkreślu, jana idzie pa niekalkich kirunkach, hetak ža jana budzie praciahvacca», — skazaŭ Budanaŭ.
Pry hetym jon zajaviŭ, što padčas ahresii suprać Ukrainy rasiejcy stracili vajennuju moc.
«Prafiesijnaje vojska ŭ ahulnym sensie skončyłasia vosieńniu minułaha hoda, vajujuć mabilizavanyja. Heta taksama vidavočny fakt. Vytvorčaść novych vidaŭ uzbrajeńnia i techniki niedastatkovaja. Toje, što jany zajaŭlajuć i sprabujuć pakazać, nie adpaviadaje rečaisnaści», — skazaŭ kiraŭnik vajskovaj vyviedki.
«Nielha prosta kazać, što ŭ ich usio drenna, što jany durnyja i h. d. Nie, heta zusim nie tak. Jany prystasoŭvajucca, sprabujuć źmianić taktyku prymianieńnia svaich uzbrojenych sił», — padkreśliŭ jon.
Pry hetym kiraŭnik HUR padkreśliŭ, što sa stratehijaj u rasiejcaŭ ničoha nie atrymlivajecca, ale z taktykaj «jość, na žal, pazityŭnyja dla ich zruchi».
«Ciapier jany šmat u čym kapirujuć našy dziejańni», — dadaŭ Budanaŭ.
Ciapier čytajuć
«Pieraapranuŭsia ŭ amapaŭca i dyryžyravaŭ čornaj dubinkaj». Adzin z zasnavalnikaŭ «Volnaha choru» — pra akcyi ŭ handlovych centrach u 2020‑m i pracu ŭ fiłarmonii ŭ Litvie55
Kamientary
A tak vyhladaje, što jon daŭno ŭ kalandar nie zahladaŭ. Tamu nahadaju, što poŭnavartasnaja vajna idzie ŭžo bolš za 1,5 hady