Stała viadoma, za što asudzili šumilinskaha čynoŭnika, jakoha troliła «Rudabielskaja pakazucha»
Raniej paviedamlałasia pra toje, što ŭ Šumilinie byŭ addadzieny pad sud Siarhiej Dźmitryjevič Biełahałoŭ — čynoŭnik, jaki pierad tym nie moh u telefonnaj razmovie rastłumačyć błohiercy Volzie Pavuk, čamu ŭ jahonym rajonie bankrutujuć kałhasy. Było viadoma tolki, što sudzili jaho za słužbovuju niadbajnaść, a ciapier prajaśnilisia i detali suda.
Vyjaviłasia, što kolišniamu kiraŭniku spraŭ Šumilinskaha rajvykankama pastavili ŭ vinu toje, što adna žančyna ŭ budynku, jaki naležyć rajvykankamu, pravaliłasia ŭ padvał i zahinuła.
Napiaredadni Novaha hoda žančyna ŭpała ŭ techničnuju adtulinu budynka, jaki znachodziŭsia na bałansie vykankama paśla pieradačy ad likvidavanaha rajspažyŭtavarystva. Padvał byŭ hłybinioj 175 sm, a rost samoj žančyny składaŭ 171 sm.
Pakolki padvał byŭ častkova zatopleny ledzianoj vadoj, a žančyna pry padzieńni atrymała pierałomy čatyroch rabryn i inšyja množnyja rany, to jana nie zmahła samastojna adtul vybracca i ŭrešcie pamierła.
Jak akazałasia, u budynak možna było lohka patrapić, a techničnaja adtulina była prosta nakrytaja blachaj.
U vyniku ŭžo byłomu čynoŭniku vynieśli prysud u 3 hady «chatniaj chimii» z zabaronaj na 3 hady zajmać kiraŭničyja pasady. Akramia taho, jon maje spłacić 1200 rubloŭ apłaty vydatkaŭ. Z rajvykankama ž na karyść dački zahinułaj spahaniajuć kampiensacyju maralnaj škody ŭ 40 tys. rubloŭ.
Kamientary