Eks-kiraŭnik Słužby achovy na Kaŭkazie Fiederalnaj słužby achovy (FSA) Rasii Hienadź Łopyraŭ pamior u papraŭčaj kałonii № 3 u Razanskaj vobłaści. U svoj čas jon byŭ adkaznym za biaśpieku dziaržaŭnych abjektaŭ na poŭdni Rasii, uklučajučy rezidencyi prezidenta i premjera. U jaho abaviazki ŭvachodziła i sačeńnie za vydatkoŭvańniem srodkaŭ na budaŭnictva na čarnamorskim uźbiarežžy i kantrol hetych pracesaŭ, paviedamlaje The Moscow News.
Siarod inšaha, pavodle infarmacyi telehram-kanała «VČK-OHPU», hienierał kuryravaŭ i budaŭnictva rezidencyi ŭ Hielendžyku, jakaja stała viadomaja pad nazvaj «pałac Pucina» paśla rasśledavańnia kamandy Alaksieja Navalnaha.
U 2017 hodzie Łopyraŭ byŭ asudžany za chabarnictva i niezakonnaje zachoŭvańnie zbroi. Jaho aryštavali pry atrymańni chabaru na sumu 6,2 młn rubloŭ. Pry pieratrusie ŭ jaho vyjavili jašče miljard.
Pieršapačatkovy prysud hienierału FSA skłaŭ 10 hadoŭ pazbaŭleńnia voli i štraf u pamiery 150 miljonaŭ rubloŭ. Adnak paźniej prysud byŭ častkova zamienieny i skłaŭ dzieviać hadoŭ i vosiem miesiacaŭ, a štraf źniziŭsia da 130 miljonaŭ rubloŭ.
Pavodle aficyjnaj infarmacyi, śmierć Łopyrava vyklikanaja chvarobaj. Pry hetym asudžany na zdaroŭje nie skardziŭsia, u źniavoleńni nie pracavaŭ i rychtavaŭsia da ŭmoŭna-daterminovaha vyzvaleńnia, bo jahony termin nabližaŭsia da kanca.
U paniadziełak, 14 žniŭnia, jon niečakana źviarnuŭsia pa miedycynskuju dapamohu praz prablemy z dychańniem. Spačatku jaho dastavili ŭ Skapin, paśla čaho pieravieźli ŭ Razanskuju abłasnuju balnicu. Lekary pastavili niečakany dyjahnaz — lejkoz. Adnak usie pakazčyki stanu Łopyrava na momant špitalizacyi, uklučajučy EKH i KT, byli ŭ miežach normy.
Ciapier čytajuć
Usie čakali padzieńnia cen, ale ničoha padobnaha! Jak za hod źmianilisia ceny na kvatery ŭ Minsku i inšych bujnych haradach6
Kamientary