Abjadnany pierachodny kabiniet adkazaŭ na słovy Naŭsiedy, što Biełaruś — rasijskaja hubiernia
Abjadnany pierachodny kabiniet adkazaŭ na słovy prezidenta Litvy, jaki ŭčora pierad samitam NATA nazvaŭ Biełaruś rasijskaj hubierniaj. U APK ličać, što takaja traktoŭka jašče bolš sadziejničaje izalacyi krainy i naroda.
«Abjadnany pierachodny kabiniet ličyć, što takaja traktoŭka stvaraje pamyłkovaje ŭsprymańnie Biełarusi ŭ śviecie i spryjaje jašče bolšaj izalacyi našaj krainy i našaha naroda. Biełaruś — heta nie hubiernia Rasii, i biełaruski narod nie dazvolić joj takoj stać», — havorycca ŭ zajavie APK.
Kabiniet pahadžajecca, što Biełaruś jak dziaržava sapraŭdy stračvaje svoj suvierenitet praz pahłybleńnie zaležnaści ad Rasii. Da hetaha viaduć złačynnyja dziejańni rasijskaha kiraŭnictva i maryjanietkavaha režymu Łukašenki. Adnak adbyvajecca heta nasupierak voli biełaruskaha naroda, jaho imknieńniu da niezaležnaści i svabody.
«Absalutnaja bolšaść biełarusaŭ vystupaje za niezaležnaść Respubliki Biełaruś, suprać ustupleńnia Biełarusi ŭ skład Rasijskaj Fiederacyi, hetaksama jak i suprać udziełu ŭ raźviazanaj pry padtrymcy nielehitymnaha režymu Łukašenki ahresii suprać Ukrainy. Na praciahu ŭsioj svajoj historyi biełarusy zmahalisia i ciapier mužna zmahajucca za svabodu i niezaležnaść svajoj krainy i dapamahajuć Ukrainie damahčysia pieramohi nad Rasijaj», — havorycca ŭ zajavie APK.
Abjadnany pierachodny kabiniet vitaje zajavu lidaraŭ Litvy, Polščy i Łatvii da hienieralnaha sakratara NATA, u jakoj śćviardžajecca, što biełaruski narod maje patrebu ŭ padtrymcy. Demakratyčnaja, volnaja, niezaležnaja, jeŭrapiejskaja Biełaruś važnaja dla Aljansu i dla ŭsich našych mižnarodnych partnioraŭ.
U suviazi z hetym Abjadnany pierachodny kabiniet zaklikaje kiraŭnictva ŭsich krain — sajuźnic demakratyčnaj Biełarusi vystupić z zajavami ŭ abaronu suvierenitetu, niezaležnaści i terytaryjalnaj cełasnaści Respubliki Biełaruś. Nieabchodna asudzić dziejańni Rasii pa padryvie biełaruskaha suvierenitetu i pryciahnuć jaje kiraŭnictva da adkaznaści.
APK zaklikaje krainy-partniory praktyčnymi zachadami padtrymać biełaruski narod u jahonym supracivie dyktatury i supraćdziejničać sprobam inkarparacyi našaj krainy z boku Rasii.
Kamientary
Sami akramia zajaŭ ničoha nia robiać, jašče i ad druhich patrabujuć bałbatnioj zajmacca. Uvohule jaki sens znachodžańnia na samicie NATA Cichanoŭskaj, kali nie prasić zbroi i instruktaraŭ dla biełarusaŭ, znachodziačysia na terytoryi krain NATA?