«Biełaruski narod nie skaryŭsia, padziei 2020 hoda nie zabytyja». Natalla Pinčuk vystupiła ŭ Jeŭraparłamiencie
U padkamitecie pa pravach čałavieka Jeŭrapiejskaha parłamienta 28 červienia abmierkavali situacyju z pravami čałavieka i palitviaźniami ŭ Biełarusi. Na abmierkavańnie biełaruskich prablem zaprasili Natallu Pinčuk, žonku palitźniavolenaha zasnavalnika i staršyni pravaabarončaha centra «Viasna», łaŭreata Nobieleŭskaj premii miru Alesia Bialackaha, piša «Radyjo Svaboda».
Na słuchańni prysutničała kala 20 jeŭradeputataŭ, jakija cikavilisia, jak dapamahčy biełaruskim palitviaźniam i ich siemjam, vykazvali prapanovy, jak pryciahnuć ułady Biełarusi da adkaznaści za katavańni i inšyja parušeńni pravoŭ čałavieka. Hučali prapanovy, jak zrabić, kab instytut apiekunoŭ biełaruskich palitviaźniaŭ ź liku jeŭradeputataŭ dziejničaŭ bolš efiektyŭna.
Natalla Pinčuk siarod inšaha zajaviła:
«Kali b situacyja z pravami čałavieka ŭ Biełarusi była inšaja, kali b z 1995 hoda Łukašenku nie ŭdałosia krok za krokam ich źniščyć — pry maŭklivym suzirańni demakratyčnaha śvietu, — moža, nie było b siońniašniaj trahiedyi ŭkrainskaha naroda. Svabodnaja i niezaležnaja jeŭrapiejskaja Biełaruś prosta zrabiła b takija scenary niemahčymymi.
Pamyłkova ličyć, što z režymam treba tarhavacca i «nie zahaniać jaho ŭ kut», bo inačaj jon, maŭlaŭ, zdaść Biełaruś Rasii. Ništo nie pieraškadžała jamu zrabić demanstratyŭny humanitarny krok (naprykład, adpuścić chranična chvorych, pažyłych, šmatdzietnych). Ale nie, zamiest hetaha jon tolki zachoplivaje novych zakładnikaŭ, kab siejać strach. Bo biełaruski narod nie skaryŭsia, padziei 2020 hoda nie zabytyja».
Natalla Pinčuk vykazała spadziavańnie, što krainy Jeŭrapiejskaha sajuza, lidary śvietu ŭ adstojvańni demakratyčnych kaštoŭnaściaŭ prymusiać mižnarodnyja arhanizacyi, u tym liku Čyrvony Kryž, vykonvać svaju misiju.
Pinčuk zajaviła, što dyktatura Łukašenki praciahvaje adbirać u biełarusaŭ prava na identyčnaść:
«Za 2020—2023 hady farmalna zakrytyja ŭsie biez vyniatku niezaležnyja arhanizacyi, jakija zajmajucca adradžeńniem nacyjanalnaj kultury. Źniavolenyja sotni piedahohaŭ, piśmieńnikaŭ, muzykantaŭ i mastakoŭ. Za biełaruskuju movu bjuć u adździełach milicyi i pieraśledujuć u administracyjnych turmach. Miedyja, jakija śpiecyjalizujucca na historyi i kultury, abvieščanyja «ekstremisckimi». Pierapisvajucca školnyja padručniki. Adbyvajucca čystki knih u biblijatekach. Heta prykmiety etnacydu».
Kamientary