Chata, chleŭ i šmat ziamli — ad 37 rubloŭ. Šukajem varyjanty pad daču ŭ Rejestry pustych damoŭ
Adziny rejestr pustych damoŭ uvieś čas papaŭniajecca novymi varyjantami chat ad 37 rubloŭ. Realt znajšoŭ niekalki damoŭ na adlehłaści da 200 km ad Minska, jakija patencyjna mohuć jašče pasłužyć u jakaści dačy.
Subačy, Vilejski rajon, 94 km ad MKAD
Zusim nievialikaja vioska ŭ Vilejskim rajonie — adna vulica, dva dziasiatki damoŭ. Kolki ź ich žyłych — nieviadoma, ale dva dakładna ŭ Rejestry pustyja. Da Vilejskaha vadaschovišča — 23 km, zatoje pobač raka Servač.
Pieršaja chata znachodzicca pa adrasie Pramaja, 12. Ahulnaja płošča 30 kv. m, da jaje ŭ prydaču sklep, chleŭ i 20 sotak ziamli. Pra stan nieruchomaści pa adnym fota mierkavać ciažka, pradajecca jana biez aŭkcyjonu, za 1800 rubloŭ.
U inšym kancy vioscy (vulica Pramaja, 11) jość jašče adna chata. Jana bolšaja pa pamierach — 72 kv. m, i «pasahu» ceły śpis: sklep, adryny, padstreški, studnia i 25 sotak.
Usio heta možna nabyć biez aŭkcyjonu za 2900 rubloŭ.
Čyhirynka, Kiraŭski rajon, 192 km ad MKAD
Hałoŭnyja słavutaści ŭ hetaj vioscy — Čyhirynskaje vadaschovišča, raka Druć i vializnyja hrybnyja lasy. Dom znachodzicca na vulicy Druckaj, 72.
Chatu na 45 kv. m i 20 sotak ziamli addaduć za 37 rubloŭ biez aŭkcyjonu. Možna zhaniać na rybałku, a zaadno pahladzieć, što ź siabie ŭjaŭlaje heta chatka.
Kaščeličy, Vałožynski rajon, 85 km ad MKAD
Vioska znachodzicca pobač ź vialikim lesam za Vałožynam. Dabiracca zručna — vialikaja častka šlachu pa chutkasnaj trasie.
Dom tut na 67,6 kv. m, hod pabudovy — 1950. Znachodzicca na Centralnaj vulicy, numar doma nie paznačany. Tut 2 adryny, sklep, studnia i 25 sotak. Jaho vystavili na aŭkcyjon z pačatkovym koštam 37 rubloŭ. Tarhi naznačyli na 22 červienia.
Boćviny, Pastaŭski rajon, 149 km ad MKAD
Vioska małanasielenaja, lasnaja, tupikovaja. Kali vy šukajecie maksimalnaj adzinoty, to vam siudy. Tut na vulicy Lasnoj znojdziecie pustuju chatu z Rejestra. Chatka minijaciurnaja, 23 kv. m, 1946 hoda pabudovy. U haspadarcy — 20 sotak, 3 adryny i studnia.
Pra ich stan pa fota kazać składana, ale pradajecca heta za 37 rubloŭ biez aŭkcyjonu. Kab darma nie palić bienzin, možna dla pačatku patelefanavać u Juńkaŭski sielsaviet.
Stančyki, Lachavicki rajon, 132 km ad MKAD
Nievialikaja vioska, zabudova redkaja. Dom znachodzicca pa adrasie vulica Palavaja, 15. Ahulnaja płošča — 52 kv. m.
Da jaho prykładajecca adryna i vielizarny ŭčastak — 38 sotak ziamli. Pradajecca biez aŭkcyjonu, za 37 rubloŭ.
Čytajcie taksama:
«U trendach dačy». Ekśpierty raskazali, što adbyvajecca z prodažam damoŭ i što budzie dalej
Z łaźniaj i basiejnam. Za piać chvilin ad Minska pradajecca stylovy dom z brusa
Ciapier čytajuć
Sprava Softkłuba: zatrymany patryjarch biełaruskaha IT Uładzimir Sirotka i niekalki top-mieniedžaraŭ. Jany padaryli nam ARIP15
Kamientary