Polski vice-ministr: Biez vyzvaleńnia Pačobuta ni pra jakoje pasłableńnie sankcyj havorki nie budzie
Namieśnik ministra ŭnutranych spraŭ Polščy Maciej Vonsik daŭ intervju Polskamu pres-ahienctvu, u jakim nie vyklučyŭ uviadzieńnia suprać Biełarusi novych sankcyj, kali režym Łukašenki nie spynić aptypolskuju palityku.
«Polšča — akno ŭ śviet dla Biełarusi. Chaj Biełaruś karystajecca hetym aknom razvažliva i racyjanalna. My nie pahadžajemsia ni na jaki pieraśled polskich dziejačaŭ. Budziem reahavać usio macniej», — zajaviŭ Vonsik.
Taksama jon adznačyŭ, što Polšča čakaje ad biełaruskaha boku vyzvaleńnia Andreja Pačobuta. I tolki paśla taho možna budzie kazać pra mahčymaść choć by jakoha pasłableńnia nakładzienych sankcyj.
Učora źjaviłasia infarmacyja, što z 1 červienia i da asablivaha rasparadžeńnia Polšča zakryvaje ruch praź biełaruska-polskuju miažu dla hruzavych aŭtamabilaŭ, ciahačoŭ, pryčepaŭ i paŭpryčepaŭ, sastavaŭ transpartnych srodkaŭ, zarehistravanych u Biełarusi i Rasii.
Akramia taho, kiraŭnik MUS Polščy vyrašyŭ uklučyć u sankcyjny śpis 365 pradstaŭnikoŭ biełaruskaha režymu, a taksama 20 struktur i 16 pradprymalnikaŭ, pieravažna źviazanych z rasijskim kapitałam.
Usio heta — reakcyja na rašeńnie łukašenkaŭskaha suda asudzić žurnalista i aktyvista polskaj mienšaści ŭ Biełarusi Andreja Pačobuta da vaśmi hadoŭ kałonii ŭzmocnienaha režymu. 26 maja Viarchoŭny sud Biełarusi razhledzieŭ apielacyju i pakinuŭ prysud u sile.
Ciapier čytajuć
Biełaruskaja i rasijskaja armii na biełaruskaj terytoryi trenirujucca nanosić jadzierny ŭdar2
Kamientary