Dziaŭčynu zabrali z pracy i pasadzili na troje sutak za nacyjanalnuju simvoliku
Jak stała viadoma «Viciebskaj viaśnie», 11 krasavika sudździa suda Hłybockaha rajona Andrej Tarasievič razhledzieŭ administracyjnuju spravu ŭ dačynieńni da Valeryi Vasiukovič. Dziaŭčynu, jakaja rodam z Dokšyc, sudzili pa častcy 1 artykuła 24.23 KaAP (parušeńnie paradku arhanizacyi i praviadzieńnia masavych mierapryjemstvaŭ).
Valeryju Vasiukovič siłaviki zabrali z banka, dzie dziaŭčyna pracavała, i advieźli ŭ pastarunak za toje, što jana ŭ sacyjalnaj sietcy «Ukantakcie» ŭ adkrytym dostupie raźmiaściła publikacyi z vyjavaj ściaha bieł-čyrvona-biełaha koleru ź simvałam «Pahonia» ŭ vyhladzie rycara ź miačom na kani.
Na dumku sudździ, jana takim čynam praviała adzinočnaje pikietavańnie z metaj publičnaha vykazvańnia svaich hramadska-palityčnych pohladaŭ biez dazvołu Dokšyckaha rajvykankama.
Zhodna z pastanovaj suda, z raparta milicyjanta, jaki manitoryŭ staronku Valeryi i składaŭ na dziaŭčynu pratakoł, vynikaje, što da ŭsiaho na jaje staroncy było jašče raźmieščanaje ŭ svabodnym dostupie fota, na jakim jana znachodzicca ŭ kampanii dziaŭčyny i chłopca, pry hetym chłopiec trymaje ŭ ruce mabilny telefon u čachle, na jakim namalavany bieł-čyrvona-bieły ściah i simvolika «Pahonia». Heta joj taksama stavili ŭ vinu.
Padčas sudovaha pasiadžeńnia Valeryja svaju vinu nie pryznała. Tym nie mienš sudździa Andrej Tarasievič paličyŭ jaje vinavataj i pryznačyŭ dziaŭčynie troje sutak aryštu, jakija jana ŭžo adbyła.
Paśla hetych padziej Valeryja Vasiukovič usie svaje sacyjalnyja sietki ŭ internecie zrabiła zakrytymi.
Kaledž chacieŭ zasudzić studenta i spahnać ź jaho 13 tysiač rubloŭ — ale junak daŭ adpor sistemie4
Kamientary