Novyja instrumienty štučnaha intelektu Firefly ad Adobe značna sprościać pracu z vyjavami i videa
Stvareńnie animavanaha tekstu, kolerakarekcyja, dadavańnie muzyki i hukavych efiektaŭ stanuć mahčymyja šlacham prostaha naboru tekstu.
Nabor prahramnaha zabieśpiačeńnia dla redahavańnia fota i videa ad Adobe daŭno vykarystoŭvaje dapamohu mašynnaha intelektu, kab dapamahčy karystalnikam vykonvać svaju pracu. U kancy sakavika kampanija prezientavała novuju madel hienieratyŭnaha ŠI pad nazvaj Firefly, jakaja dazvalała pracavać nad vyjavami i videa z dapamohaj tolki tekstavych zapytaŭ — hetak ža, jak heta robiać našumiełyja Dall-E i ChatGPT.
Mienš čym praź miesiac paśla debiutu Adobe abviaściła, što ŭžo pracuje nad mnostvam madernizacyj i dapaŭnieńniaŭ svajoj madeli ŠI, jakija pavinny źjavicca ŭ beta-viersii prahramy Firefly paźniej u hetym hodzie. Pry hetym šmatlikija funkcyi Firefly užo dastupnyja ŭ ekasistemie Adobe, uklučajučy Premiere Pro, Illustrator, After Effects i Photoshop.
Novyja funkcyi raspracavanyja, kab dapamahčy prafiesijnym redaktaram skaracić ich pracu pa karekcyi koleraŭ, ustaŭcy płejschołderaŭ (ci vyjaŭ-zapaŭnialnikaŭ prastory ŭ makietach sajtaŭ abo mabilnych dadatkaŭ), dadańni efiektaŭ, rekamiendacyi videapierabivak dla kankretnaha prajekta. Usio heta ciapier možna budzie rabić, prosta ŭvodziačy svaje idei ŭ akno tekstavaha zapytu Firefly.
Paśla taho, jak karystalnik uvodzić tekstavy zapyt, sistema prapanuje kala paŭtuzina pieršapačatkovych varyjantaŭ malunkaŭ. Adtul karystalnik moža vybirać pamiž papularnymi stylami i efiektami, dyktavać svaje ŭłasnyja praŭki i naohuł sprabavać siabie ŭ davoli kiravanym pracesie — ažno pakul sistema nie vydaść toje, što karystalnik šukaje.
Jak prykład šyrokich mahčymaściaŭ Engaget pryvodzić funkcyju palapšeńnia koleru: karystalniki zmohuć rehulavać uzrovień jarkaści i nasyčanaści (i navat źmianiać čas sutak ci paru hoda) z dapamohaj moŭnych zapytaŭ.
Hienieratyŭnyja funkcyi štučnaha intelektu taksama buduć raspaŭsiudžvacca na aŭdyja z mahčymaściu ŭstaŭlać fonavuju muzyku i hukavyja efiekty. Čakajecca, što nieŭzabavie źjaviacca animavanyja funkcyi šryftoŭ, a taksama aŭtamatyzavanaja funkcyja b-roll, jakaja analizuje źmieściva scenara dla stvareńnia raskadrovak i prapanoŭvańnia videaklipaŭ. Aproč usich plušak, Firefly zrobić i piersanalizavanyja instrukcyi, kab pravieści novych karystalnikaŭ praz praces vykarystańnia novych funkcyj.
Ciapier čytajuć
Ajcišnika z «Varhiejminha» sudzili pa rasstrelnym artykule. Padobna, za padtrymku Ukrainy — praŭda, zrabić jon ničoha nie paśpieŭ2
Kamientary