Litoŭski biznesmien pakajaŭsia, što dapamahaŭ «Hrodna Azotu» abychodzić sankcyi
Litoŭski centr žurnalisckich rasśledavańniaŭ Siena, jaki vyvučaje mahčymyja cieniavyja schiemy pastavak uhnajeńniaŭ ź Biełarusi ŭ Jeŭrasajuz, paviedamiŭ, što litoŭski biznesmien Saŭlus Kocis prynios publičnyja prabačeńni, što praz svaju kampaniju ŭ Kyrhyzstanie dapamahaŭ abychodzić sankcyi ŭ dačynieńni «Hrodna Azota».
Raniej pa vynikach žurnalisckich rasśledavańniaŭ stała viadoma pra isnavańnie łancužka kampanij, jakija zajmajucca ŭvozam u Litvu biełaruskaha karbamidu pad vyhladam uhnajeńnia, zroblenaha kampanijami ź inšych krain. Padsankcyjny biełaruski «Hrodna Azot» sam handlavać ź ES adkryta nie moža, ale rabiŭ heta praz «firmu-prakładku».
Pieravozku ŭhnajeńniaŭ pa čyhuncy apłaciła kłajpiedskaja kampanija Girera, a pakupnikom značycca firma Misir.Co z Kyrhyzstana, akcyjanieram jakoj źjaŭlajecca litoŭski biznesoviec Saŭlus Kocis. Jon sam paćvierdziŭ Siena, što ŭdzielničaŭ u hetaj schiemie.
Pradprymalnik publična paprasiŭ prabačeńnia va ŭsich, chto «byŭ rasčaravany biezadkaznymi pavodzinami» jaho samoha i jaho kaleh, i pryznaŭsia, što maje namier «zhareć u ahni soramu i nianaviści da siabie». Jon taksama zapeŭniŭ, što damova na pastaŭku karbamidu ź Biełarusi ŭžo skasavanaja, a dziejnaść Misir.Co prypynienaja.
Takoje niečakanaje praśviatleńnie biznesmiena vidavočna źviazanaje z tym, što apošnim časam litoŭskija ŭłady vyrazna zaśviedčyli surjoznaść svaich namieraŭ nie na słovach, a na spravie pastavić zasłonu šerym schiemam, skiravanym na abychod zachodnich sankcyj. Na pačatku hoda pačałosia rasśledavańnie kantrabandy ŭhnajeńniaŭ «Hrodna Azota», u niekalkich kampanijach prajšli vobšuki i zatrymańni.
Kamientary