U Połacku siońnia raźvitvalisia ź Ivanam Kalinoŭskim — talenavitym miascovym ekskursavodam i krajaznaŭcam, sapraŭdnym patryjotam svajoj ziamli. Jon pajšoŭ z žyćcia 26 lutaha.
Ivan Kalinoŭski, jak adznačajuć u niekrałohu siabry i kalehi, «byŭ z taho pieršaha paślavajennaha pakaleńnia, jakoje z malenstva adčuvała prahu da viedaŭ, žadańnie znajści svajo miesca, addana pracavać na karyść ludziam i hodna słužyć abranaj na ŭsio žyćcio spravie».
Naradziŭsia jon u vioscy Lachava Ušackaha rajona, paśla skončyŭ Połackaje miedycynskaje vučylišča i pracavaŭ u roznych miedycynskich ustanovach. Ale ź dziacinstva cikaviŭsia historyjaj i krajaznaŭstvam, tamu, kali ŭ BSSR pačali pracavać biuro padarožžaŭ i ekskursij, množylisia ekskursijnyja maršruty, adkryvalisia kursy padrychtoŭki ekskursavodaŭ, Kalinoŭskaha taksama hetaja płyń zachapiła i prymusiła źmianić śfieru dziejnaści.
Doŭhi čas jon pracavaŭ u Połackim biuro padarožžaŭ i ekskursij, raspracoŭvaŭ maršruty, pieradaŭ prafiesijnaje majsterstva nie adnamu pakaleńniu ekskursavodaŭ. U 1990-ja hady ŭznačaliŭ Połackaje biuro padarožžaŭ i zrabiŭ usio, kab jano praciahvała svaju dziejnaść navat u vielmi składanych materyjalnych umovach.
Siarod raspracavanych Ivanam Kalinoŭskim novych maršrutaŭ pa Viciebščynie źjavilisia «Da duchoŭnych śviatyniaŭ», «Padarožža pa Pastaŭskaj ziamli», «Vajna 1812 hoda na Połaččynie», «Litaraturnymi ściažynkami Prydzvińnia», «Pa śladach šlachu z varah u hreki».
Hetyja maršruty raskryvajuć značnyja histaryčnyja i kulturnyja płasty Połaččyny, Ušaččyny i Hłyboččyny, pakazvajuć žyćciovy i tvorčy šlach słynnych tvorcaŭ: Vasila Bykava, Ryhora Baradulina, Pietrusia Broŭki, adkryvajuć šmatlikija imiony ziemlakoŭ — Ihnata Bujnickaha, Jazepa Drazdoviča, Paŭła Suchoha i inšych.
U 2000-ja hady z-pad jaho piara vyjšła šmat navukova-papularnych vydańniaŭ i turystyčnych daviednikaŭ. Jon pisaŭ teksty dla pryhožych fotaalbomaŭ, ciesna supracoŭničaŭ z Nacyjanalnym ahienctvam pa turyzmu, vydaviectvami «Ryftur», «Biełaruś» i «Vyšejšaja škoła». Razam z nastaŭnikami Połacka raspracoŭvaŭ navučalny dapamožnik «Połackaznaŭstva» dla šostych kłasaŭ.
Akramia taho, Ivan Kalinoŭski vychavaŭ cełuju plajadu ekskursavodaŭ dla Połacka i Połaččyny.
Pachavali vybitnaha znaŭcu Połackaj ziamli na mohiłkach vioski Zaazierje, u jakoj prajšli apošnija hady jaho žyćcia.
Kamientary