«Pamiž Hitleram i Adenaŭeram treba vybirać Adenaŭera». Nam moža nie padabacca rytoryka rasijskich antypucincaŭ, ale heta nie padstava ich nie padtrymlivać
Žurnalist Maksim Machańkoŭ vykazaŭsia ŭ fejsbuku pra dastatkova raspaŭsiudžanaje ŭjaŭleńnie adnosna taho, što, maŭlaŭ, rasijskija demakraty pracujuć na Pucina, bo nie majuć u svaich prahramach punkta ab abaviazkovym raspadzie Rasii na drobnyja šmatki.
U intaresach usiaho svabodnaha śvietu — paražeńnie Rasii ŭ vajnie, vyvad rasijskich vojskaŭ z akupavanych terytoryj Ukrainy, Hruzii i Małdovy, kałaps palityčnaha režymu, asudžeńnie rasijskaha impieryjalizmu. Upeŭnieny, što heta pavinna stać płatformaj antypucinskich sił i ŭnutry samoj Rasii.
Časta možna pačuć krytyku ŭ bok hetych samych antypucinskich sił (naprykład, Chadarkoŭskaha), što jany, hady, nie chočuć raspadu Rasii, chočuć zachavać jaje ŭ mižnarodna pryznanych miežach 1991 hoda, biez adarvańnia ad Rasii terytoryj. A tamu ŭsie jany pracujuć na Pucina (ci navat horšyja za Pucina — impiercy ŭ «libieralnaj» abhortcy).
I tut adrazu bačna, nakolki ludzi adarvanyja ad realnaści, i nakolki va Uschodniaj Jeŭropie ŭsio kiepska z pamiaćciu pra postvajennuju Jeŭropu.
Nijaki palityk, u tym liku antypucinski, jaki pretenduje na vysokuju dziaržaŭnuju pasadu (ciapier ci ŭ budučyni) u pryncypie nikoli nie budzie stavić pytańnie ab adarvańni terytoryj ad svajoj krainy ŭ mižnarodna pryznanych miežach. Heta — narmalna. Bo lubyja padobnyja razmovy stali b dla takoha palityka palityčnaj śmierciu. I Rasija tut nie ŭnikalnaja.
Postvajennaja Niamieččyna. U krainie paśla vajennaha paražeńnia i haniebnaha ahidnaha hitleryzmu adbyvajecca denacyfikacyja pad kantrolem sajuźnikaŭ. Krainaj kiruje CHDS/CHSS pad kiraŭnictvam Konrada Adenaŭera — pryncypovaha, niepachisnaha krytyka Hitlera i nacyzmu ź biezzahannaj reputacyjaj, praktykujučaha katolika.
U vyniku Druhoj suśvietnaj vajny Niamieččyna straciła terytoryi, ale CHDS (pad kiraŭnictvam antyhitleraŭca Adenaŭera) praciahvała zajaŭlać pra mahčymaść abjadnańnia Niamieččyny ŭ miežach… 1937 hoda! CHDS spakojna malavała Niamieččynu na svaich postarach u starych miežach ažno da 1980-ch, praź dziesiacihodździ (!!!) paśla taho, jak Niamieččyna prajhrała ŭ vajnie i straciła Sileziju, Prusiju i Pamieraniju.
Było b dziŭna, kali b antypucinskija siły ŭ Rasii pavodzili siabie niejak inakš. Tym bolš, što da vajennaha paražeńnia Rasii jašče vielmi i vielmi daloka.
Toje, što havorać antypucinskija siły ŭ Rasii, jašče tysiačy razoŭ moža nam nie spadabacca, ale heta nie padstava hetyja siły nie padtrymlivać. Pamiž Hitleram i Adenaŭeram treba vybirać Adenaŭera.
-
«Dla nas, BNF, vyłučeńnie Šuškieviča było nažom u śpinu». Navumčyk i Statkievič vyśviatlajuć rolu Biełaruskaha zhurtavańnia vajskoŭcaŭ
-
Ihar Karniej: Budzie kamanda — zrobiać usio, kab i z hodam trymać u zakładnikach choć piacihodku, choć bolej
-
Kiraŭnik Palantir: U epochu ŠI buduć mieć pośpiech tolki dźvie hrupy ludziej
Kamientary