Rasijanie vyvieli na pravajenny mitynh u Maskvie dziaciej, maci jakich zabili ŭ Maryupali
Na mitynhu-kancercie ŭ «Łužnikach» u padtrymku vajny suprać Ukrainy rasijskija prapahandysty vykarystali dziaciej z Maryupala, maci jakich zahinuła ad abstrełaŭ z boku rasijskich vojskaŭ, piša vydańnie «Važnyja historyi».
22 lutaha na pravajennym mitynhu-kancercie ŭ Maskvie vystupiŭ «dobraachvotnik» zachopnickaj armii z Čalabinska Jury Haharyn z pazyŭnym Anioł. Jaho pradstavili jak ratavalnika 367 dziaciej z Maryupala. Niekatoryja ź dziaciej byli na scenie i dziakavali jamu.
Tak, 15-hadovaja Hanna Navumienka sa sceny skazała: «Dziakuj dziadźku Juru za toje, što jon mianie, maju siastru i sotni tysiač dziaciej vyratavaŭ z Maryupala».
Na scenie stajała i jaje małodšaja siastra Karalina — jana ad hučnych hukaŭ zakryvała vušy.
Jak piša vydańnie, Hanna Navumienka i jaje siastra sapraŭdy rodam z Maryupala. Dziesiać miesiacaŭ tamu padčas akupacyi horada maci dziaŭčynak zabiła askołkami.
Kali pačałasia vajna, siamja Navumienkaŭ — Volha ź jaje hramadzianskim mužam Arturam i dzieci Hanna, Karalina i Dania — spačatku chavalisia ad abstrełaŭ u byłym DK budaŭnikoŭ, a potym u budynku rajvykankama.
Volha zahinuła ŭ pieršych čysłach krasavika: jana, jak śćviardžajuć vidavočcy, «vybiehła pa cyharety», i jaje zabiła askołkami niedaloka ad 4-j balnicy. Pachavali žančynu prosta na terytoryi balnicy.
Svajačka Artura, hramadzianskaha muža zahinułaj maci dziaciej, raskazała «Važnym historyjam», što chłopčyk Daniił zastaŭsia z babulaj, Karalina — ź bijałahičnym baćkam, a Hańnie pryznačyli inšaha apiekuna.
Vydańnie «Važnyja historyi» taksama adznačaje, što jak minimum traich inšych dziaciej, jakich vyvieli na scenu ŭ «Łužnikach», voziać z šou «dziadźki Jury» razam ź ich maci.
Ciapier čytajuć
U archivach SBU znajšlisia dakumienty, jak savieckija śpiecsłužby zavierbavali emisara AUN, ale ŭkrainskaje padpolle heta vykryła i zabiła zdradnika88
Kamientary