Ułady ŭzakonili pirackaje vykarystańnie filmaŭ i kampjutarnych prahram, a taksama šery impart
Heta tyčycca pradukcyi «niedružalubnych» krain.
Zakon ad 3 studzienia №241-Z «Ab abmiežavańni vyklučnych pravoŭ na abjekty intelektualnaj ułasnaści» dazvalaje vykarystoŭvać biez zhody pravaŭładalnika kampjutarnyja prahramy, aŭdyjavizualnyja i muzyčnyja tvory z krain, jakija ŭčynili «niedružalubnyja dziejańni».
Heta, jak adznačajecca ŭ zakonie, patrebna dla «zabieśpiačeńnia funkcyjanavańnia infarmacyjna-kamunikacyjnaj infrastruktury, stvareńnia ŭmoŭ dla ličbavaha raźvićcia i pavyšeńnia ŭzroŭniu infarmacyjnaj biaśpieki, raźvićcia intelektualnaha i duchoŭna-maralnaha patencyjału hramadstva».
U dakumiencie prapisana, što kali vykarystańnie hetych prahram i tvoraŭ płatnaje, to musić vypłačvacca hrašovaja ŭznaharoda. Hrošy buduć pieraličvacca na rachunak patentnaha orhana i zachoŭvacca tam da zapatrabavańnia. Kali na praciahu troch hadoŭ srodki nie zapatrabavali, jany pierachodziać u respublikanski biudžet. Pamiery vypłat vyznačaje Saŭmin.
Toj ža dakumient uzakońvaje šery impart (jaho nazyvajuć «paralelnym»). Dazvalajecca biez zhody pravaŭładalnikaŭ z krain, jakija čyniać «niedružalubnyja dziejańni», uvozić tavary, u jakich vykarystoŭvajucca abjekty intelektualnaj ułasnaści, kali takija tavary istotna važnyja dla ŭnutranaha rynku. Ich pieraliku pakul niama.
Kali pravaŭładalniki praciahvajuć supracoŭničać ź Biełaruśsiu, to ich hetyja źmieny nie zakranuć.
Vyšejpieraličanyja dziejańni nie buduć ličycca biełaruskimi ŭładami parušeńniem vyklučnych pravoŭ.
Zakon budzie dziejničać da 31 śniežnia 2024 hoda.
Ciapier čytajuć
Hieroja telefonnych źlivaŭ pałkoŭnika Kisiala, jaki zaklikaŭ kalečyć demanstrantaŭ, raptoŭna apuścili na rajonny ŭzrovień8
Kamientary