Prapahandysty vykłali «sakretny dakumient pra katastrafičnyja straty Ukrainy». Ale jon akazaŭsia fejkam
Rasijskija ŚMI vydali čarhovuju «siensacyju» pra śmierć 35 tysiač ukrainskich sałdat, jakich vydali za byccam źnikłych bieź źviestak. Dakumient pačali publikavać i biełaruskija praŭładnyja krynicy. Praŭda, paśla niepraciahłaj pravierki stanovicca vidavočna, što hety dakumient fejkavy.
Hety dakumient siońnia ceły dzień abmiarkoŭvaje rasijskaja prapahanda. Toje, što jon fejkavy, lohka pravieryć.
Pieršaje — jon prosta nieachajna zrobleny. Kali pryhledziecca, to jon maje niejkija dziŭnyja ŭstaŭki, a tekst naniesieny amal napeŭna ŭ niejkim hrafičnym redaktary. U pravym kucie dakumienta jość nabor litar, jaki pry blizkim razhladzie akazaŭsia častkaj nadpisu «ciłkom tajemno», nieachajna nieprybranym pry redahavańni ŭ hrafičnym redaktary. Tak ža nieachajna ŭstaŭleny i QR-kod unizie dakumienta (vuhły abrezanyja).
Sami «dakumienty» vykładzienyja vyklučna ŭ farmacie vyjavaŭ, na ich nie staić anivodnaha podpisu ci piačatki słužbovaj asoby, a «śpis zahinułych» maje niekalki socień proźviščaŭ, ale numary iduć niepaśladoŭna. Taksama śpis zahinułych «marpiechaŭ» maje amal 3300 proźviščaŭ byccam by zahinułych ź dźviuch čaściej marskoj piachoty (ź jakich 2600 prapuščanyja), što roŭnaje ci navat bolšaje za ahulny kolkasny skład hetych bryhadaŭ.
Zhodna z kamientarom, jaki my zaprasili va ŭkrainskaha dziaržsłužboŭca, dakumient maje i inšyja prykmiety padrobki:
«Takija dakumienty afarmlajucca pa-inšamu. Niama vyraŭnoŭvańnia tekstu, što zaŭsiody robiać dziaržaŭnyja struktury. «Tilki v adriesu» — tak nie pišuć, pravilna «tilki na adriesu», ale i tak nikoli nie pišuć. Taksama nie pišuć «šanovnij panie Sierhij» u takich vypadkach, sami zvaroty inšyja. Taksama fraza «zahinułych, jakich vyznali źnikłymi bieź źviestak», — heta niapravilna, bo mahčyma tolki naadvarot, vyznać pamierłym źnikłaha bieź źviestak praz sud».
Druhoje — dakumient vykładzieny na šerah cieniavych forumaŭ u paniadziełak ranicaj karystalnikami (ci adnym čałaviekam), jakija stvarali ŭlikovy zapis za nievialiki čas da publikacyi. Ani da, ani paśla hetyja karystalniki ničoha nie publikavali, usie publikacyi supravadžajucca adnolkavym tekstam pra «spynieńnie vajny i pašyreńnie NATA» i majuć vielmi mała prahladaŭ i vodhukaŭ.
Treciaje — «chakierskaja hrupa Anarchist Kombatant», jakaja byccam by ŭzłamała «słužbovy archiŭ» načalnika hienieralnaha štaba Siarhieja Šaptały, zhadvajecca tolki adnojčy i ŭ suviazi z hetym «źlivam». Zhadak pra jaje ani na chakierskich forumach, ani ŭ inšych krynicach da pazaŭčorašniaj ranicy znajści nie ŭdałosia. Taksama vykładzieny tolki adzin «słužbovy dakumient», chacia śćviardžajecca, što ŭ rukach ceły «archiŭ».
Čaćviortaje — i słužbovyja asoby, pieraličanyja ŭ «dakumiencie», i ludzi, jakija «zahinuli», uziatyja ź internetu (danyja pry hetym pryviedzienyja z pamyłkami) abo z hałavy. Da prykładu, načalnikam Kadravaha centra Uzbrojenych siłaŭ Ukrainy nazvany «pałkoŭnik Mikoła Mićkievič». My znajšli takoha čałavieka, i jon sapraŭdy vajskoviec — ale słužyć u Kamandavańni abjadnanych siłaŭ USU, što źjaŭlajecca zusim inšaj strukturaj.
A častka «zahinułych» akazalisia žyvymi abo pałonnymi, što možna paćvierdzić praź ichnija sacsietki abo internet. Da prykładu, adna z žančyn, što jość u śpisach, maje zusim inšuju datu naradžeńnia, i niadaŭna joj dali orden «Za mužnaść» II stupieni. U niekatorych ludziej nie supadajuć i inšyja danyja, tamu, vidać, śpis źbiraŭsia na chutkuju ruku i z roznych krynicaŭ, a praź lanotu atrymałasia sabrać proźviščy tolki kala 700 čałaviek — usie jany tak ci inačaj zhadvajucca ŭ ruskamoŭnych prapahandysckich resursach sa śpisami «źnikłych bieź viestak i pałonnych bajcoŭ USU».
«Analiz» hetaha psieŭdadakumienta ŭžo vyjšaŭ na šmatlikich prapahandysckich resursach u Rasii. Padchapili jaho i niekatoryja biełaruskija dziaržSMI i praŭładnyja kanały.
«Naša Niva» — bastyjon biełaruščyny
PADTRYMAĆ
Kamientary