Dypłamaty: Reakcyja Zachadu na amnistyju budzie zaležać jak ad kolkaści vyzvalenych, tak i ad dalejšych krokaŭ
Łukašenka anansavaŭ amnistyju, jakaja zakranie bolš za 8000 čałaviek, u tym liku častku palityčnych źniavolenych. «Naša Niva» pahavaryła z zachodnimi dypłamatami ab tym, jak ich krainy ŭsprymuć taki krok.
«Treba jašče pahladzieć što heta za amnistyja, kolki z hetych 8000 budzie palityčnych, a kolki z palityčnych — značnyja fihury ŭ hramadstvie, — kamientuje płan amnistyi dypłamat adnoj z krain Jeŭrasajuza. — Jak heta bačycca nam, to takim krokam režym Łukašenki choča praduchilić pašyreńnie sankcyj za ŭdzieł u vajnie suprać Ukrainy», — adznačyŭ dypłamat.
«Zadača-maksimum Minska — heta źniaćcie sankcyj na kalij. Reakcyja Zachadu na amnistyju budzie zaležać jak ad kolkaści vyzvalenych, tak i ad dalejšych krokaŭ», — kaža dypłamat.
«U vypadku kali adnych vypuściać, a inšych buduć aryštoŭvać, my nazyvajem heta «ratacyjaj palitviaźniaŭ», reakcyja budzie niehatyŭnaja».
Ën raskazaŭ, što Jeŭrasajuz hatovy razhladać varyjanty pašyreńnia sankcyj na inšyja siektary ekanomiki.
Inšy jeŭrapiejski dypłamat źviarnuŭ uvahu na toje, jak adroźnivajucca ad pazicyi Minska dziejańni kiraŭnictva Kazachstana.
«Chopić užo handlavać ludźmi, nie taja situacyja. Treba rabić inšyja kroki, krok za krokam. Paśla praviadzieńnia svabodnych vybaraŭ Biełaruś zmoža atrymlivać dapamohu ad Zachada i vierniecca da trajektoryi raźvićcia», — skazaŭ dypłamat.
«Dla narmalizacyi adnosin treba sukupnaść krokaŭ: narmalizacyja situacyi z pravami čałavieka, vyvad rasijskich vojskaŭ z terytoryi Biełarusi i zabarona na vykarystańnie pavietranaj terytoryi, spynieńnie lubych vajskovych vučeńniaŭ na hranicy z Ukrainaj, svabodnyja vybary, — pieraličvaje balučyja punkty dypłamat. — Rasija pieražyvaje prynižeńnie va Ukrainie, i heta tolki pačatak. Voś kantekst, u jakim my ciapier».
«Što da amnistyi, to ja ŭstrymajusia ad lubych kamientaroŭ. Ja b nie chacieŭ, kab z-za majho kamientara źmienšylisia šancy na vychad na svabodu luboha z palitźniavolenych. Davajcie vierniemsia da hetaj razmovy, jak tolki abiacańni materyjalizujucca», — skazaŭ pradstaŭnik jašče adnoj krainy.
Ciapier čytajuć
Łukašenka niervova prakamientavaŭ vizit Cichanoŭskaj u Kijeŭ45
Kamientary