Aktrysa Maryna Hrycuk, jakuju vyvozili z Kijeva «na tanku», źjaviłasia na praŭładnym mierapryjemstvie ŭ Minsku
Hrycuk viadzie ŭračystaje praŭładnaje mierapryjemstva da 100-hodździa biełaruskaj advakatury. Choć u sacsietkach jana i dahetul siabie paznačaje ŭdzielnicaj ukrainskaha humarystyčnaha prajekta «Dyziel-šou».
Niezaležnaja advakatura ŭ Biełarusi za apošnija hady była faktyčna źniščanaja. Advakaty, jakija zajmalisia abaronaj palitźniavolenych, pazbaŭlajucca licenzij, a Ministerstva justycyi ŭznačaliŭ były vysokapastaŭleny siłavik bieź jurydyčnaj adukacyi.
Što da Maryny Hrycuk, to kiraŭnik prajekta «Dyziel-šou» Jahor Krutahałoŭ u lipieni ŭ adnym ź intervju adznačaŭ:
«Adnosna Marusi Hrycuk. To jana trapiła ŭ akupacyju pad Kijevam. Jany 17 sutak prasiadzieli biez suviazi, bieź śviatła. Na 17-y dzień jaje muž-biełarus damoviŭsia, kab jaje zabrać. Za joj pryjechaŭ tank. Jana sieła ŭ tank i źjechała ŭ Biełaruś. Jaje muž artyst. Jon prosta chacieŭ vyratavać svaju žonku. My nie mahli dapamahčy».
Pry hetym ahulnaja praŭkrainskaść pohladaŭ Hrycuk u jaho sumnievaŭ nie vyklikała.
Maryna Hrycuk rodam z Bresta, vučyłasia ŭ Bresckim dziaržaŭnym techničnym univiersitecie. Padčas vučoby stała hulać u KVZ, spačatku za svaju VNU, a potym trapiła ŭ zbornuju Biełaruskaha dziaržaŭnaha ŭniviersiteta. Kamanda BDU za jaje časami dvojčy stanaviłasia čempijonam vyšejšaj lihi KVZ, heta byŭ jaje załaty čas. Z 2004 hoda Hrycuk pracavała na biełaruskim telebačańni, u 2019 hodzie dałučyłasia da akciorskaha składu ŭkrainskaha «Dyziel šou».
Kamientary