Nad śpiavačkaj Meryjem Hierasimienka adbyŭsia jašče adzin sud, joj znoŭ dali 15 sutak
Śpiavačka Meryjem Hierasimienka, jakuju zatrymali paśla vystupu ŭ bary «Banki-Butelki», nie vyjšła na volu paśla 15 sutak aryštu. Nad joj adbyŭsia jašče adzin sud, daviedałasia «Zierkało».
Infarmacyja pra toje, što Meryjem Hierasimienka asudzili na 15 sutak, źjaviłasia ŭ tielehram-kanale «Śpisy zatrymanych» 6 žniŭnia. Dakładnaja data suda dahetul nieviadomaja. Ale, jak miarkujecca, pasiadžeńnie suda adbyłosia z 1 pa 5 žniŭnia. Artykuł, pa jakim sudzili vykanaŭcu, paznačany taksama nie byŭ.
Vychodzić, na minułym tydni dziaŭčyna pavinna była vyjści na volu. Adnak, jak paviedamiŭ «Zierkału» adzin sa znajomych śpiavački, Meryjem usio jašče nie doma.
U kancylaryi suda Centralnaha rajona, kudy žurnalisty «Zierkała» patelefanavali jak zvyčajnyja hramadzianie, paviedamili, što «apošniaje pasiadžeńnie, jakoje ŭ jaje było, adbyłosia 10 žniŭnia». Dziaŭčynie dali 15 sutak.
— Vychodzić, heta dla jaje druhoje pasiadžeńnie?
— Značyć, było jašče adno, tamu što ŭ nas staić data vyniasieńnia — 10.08.
— To-bok druhi sud?
— Tak.
Jak skazali ŭ kancylaryi, sudzili śpiavačku pavodle artykuła 24.23 KaAP (parušeńnie paradku arhanizacyi abo praviadzieńnia masavych mierapryjemstvaŭ).
3 žniŭnia na terasie bara «Banki-Butelki» na Zybickaj u Minsku prajšoŭ vuličny kancert minskaj śpiavački Meryjem Hierasimienka. Siarod piesień, jakija jana vykanała, byli i tvory ŭkrainskaha hurta «Akijan Elzy». U pryvatnaści, pieśnia «Obijmi».
Hledačoŭ na kancert sabrałasia šmat. Jany publikavali videa ŭ sacsietkach, niaredka sa stykierami ŭ žoŭta-sinich kolerach i inšymi znakami padtrymki Ukrainy.
Paśla taho, jak hetuju temu pačali piedalavać režymnyja prapahandysty, pačalisia represii. Va ŭstanovu pryjšli praviarajučyja z sanstancyi i MNS. Paźniej stała viadoma, što ŭładalnik bara Andrej Žuk zatrymany na 30 sutak, a Meryjem Hierasimienka — na 15.
Va ŭpraŭleńni kultury Minharvykankama skazali, što toje, što adbyłosia ŭ bary «Banki-butelki», nibyta nie źviazanaje ź pieśniaj, jakuju vykanała Meryjem Hierasimienka. Pryčyna, maŭlaŭ, u tym, što «hetaje mierapryjemstva nie było sankcyjanavanaje ni adnym orhanam dziaržkiravańnia». Bo 1 žniŭnia ŭstupiła ŭ siłu pastanova, pa jakoj ustanovy, dzie vystupajuć artysty, naprykład, bary i restarany, pavinny być uklučanyja ŭ rejestr arhanizataraŭ kulturna-vidoviščnych mierapryjemstvaŭ.
Ale važna pamiatać, što prablemy ŭ Hierasimienka i Žuka pačalisia paśla taho, jak temu vystupleńnia śpiavački pačali ŭ svaich kanałach razhaniać prapahandysty i siłaviki. I ich pretenzii byli čysta ideałahičnyja.
Kamientary