Viarchoŭny sud likvidavaŭ Biełaruski niezaležny prafsajuz i prafsajuz REP
Viarchoŭny sud Biełarusi pa isku prakuratury likvidavaŭ dva niezaležnyja prafsajuzy. Na čarzie jašče try.
Rašeńniem Viarchoŭnaha suda ŭ Biełarusi likvidavanyja Biełaruski niezaležny prafsajuz i Biełaruski prafsajuz rabotnikaŭ radyjoelektronnaj pramysłovaści (REP), paviedamlaje «Novy čas».
14 lipienia Viarchoŭny sud prymie rašeńnie pa Svabodnym prafsajuzie Biełaruskim (SPB) i Svabodnym prafsajuzie mietalistaŭ (SPM). 18 lipienia — pa Biełaruskim kanhresie demakratyčnych prafsajuzaŭ. Usie pieraličanyja prafsajuzy ŭvachodzili ŭ BKDP.
Ich likvidacyja aznačaje toje, što ŭ Biełarusi budzie praktyčna całkam začyščany niezaležny prafsajuzny ruch. Da hetaha času bolš za dziesiać lidaraŭ i aktyvistaŭ hetych prafsajuzaŭ siadziać za kratami.
10 červienia hienprakuror Andrej Švied nakiravaŭ u Viarchoŭny sud zajavu ab spynieńni dziejnaści niekalkich niezaležnych prafiesijnych abjadnańniaŭ, takich jak SPM, SPB, BNP, REP i BKDP. 29 červienia ŭ Viarchoŭnym sudzie adbyłasia papiaredniaja hutarka z pradstaŭnikami prafsajuza nakont isku ad Hienprakuratury z prośbaj spynić dziejnaść Svabodnaha prafsajuza mietalistaŭ.
U isku ab likvidacyi, jaki prakuratura padała ŭ Viarchoŭny sud, paviedamlajecca, što Svabodny prafsajuz mietalistaŭ atrymlivaŭ biazvypłatnuju materyjalnuju dapamohu ad mižnarodnych struktur.
18 i 19 krasavika pa krainie prakaciłasia chvala pieratrusaŭ i zatrymańniaŭ aktyvistaŭ niezaležnaha prafsajuznaha ruchu. U vyniku byli zatrymanyja i nieŭzabavie pryznanyja palitviaźniami staršynia Biełaruskaha kanhresa demakratyčnych prafsajuzaŭ (BKDP) Alaksandr Jarašuk, jaho namieśnik Siarhiej Antusievič, lidar prafsajuza radyjoelektronnaj pramysłovaści (REP) Hienadź Fiadynič, prafsajuznyja aktyvisty Vacłaŭ Areška, Michaś Hromaŭ, Vital Čyčmaroŭ, Vasil Bieraśnieŭ. Aktyvistku prafsajuza REP Zinaidu Michniuk asudzili da dvuch hadoŭ kałonii. Sam niezaležny prafsajuz REP pryznany ŭ Biełarusi «ekstremisckaj arhanizacyjaj».
Kamientary