«Toje ž samaje, što budzie napisana Adidas». Jak načalnik buda-kašaloŭskaj milicyi tłumačyć vykarystańnie svaimi padnačalenymi simvałaŭ vajennaj ahresii
Na vychadnych supracoŭniki Buda-Kašaloŭskaha RAUS (Homielskaja vobłaść) vyjšli na «Dzień zdaroŭja» ź simvałami Z i V, a taksama łozunhami rasijskich vajskoŭcaŭ, jakija napali na Ukrainu. Pra heta napisała miascovaja rajonka. Vydańniu «Zierkało» ŭdałosia spytacca ŭ načalnika adździeła, što heta značyć, a jašče — ci možna žycharam rajona vychodzić na vulicu z ukrainskim ściaham.
U kamandy supracoŭnikaŭ rajadździeła ŭ rukach samarobny płakat «Zadaču Vypołnim». U niekatorych na kiepkach pobač ź biełaruskim ściaham byli stužki i ŭ kolerach rasijskaha. «Zierkało» patelefanavała načalniku Buda-Kašaloŭskaha RAUS Vitalu Padziarunu, pradstaviŭšysia žycharom rajcentra, i spytałasia, ci značyć heta, što ŭ adździele padtrymlivajuć napad Rasii na Ukrainu.
Doŭhi čas havaryć pa telefonie na hetuju temu kiraŭnik RAUS nie chacieŭ — zaprašaŭ pryjści asabista na pryjom abo dasłać piśmovy zvarot. Ale potym usio ž daŭ adkaz:
— Našy supracoŭniki nie zabaraniajuć niejkija momanty mohuć [vykarystoŭvać], toje ž samaje, što na šapcy budzie napisana Adidas ci jašče niešta. Heta ž nie zabaroniena, pravilna? Šapki nadzieli takija, jakija byli.
Taksama ŭ jaho spytalisia, čamu ŭ biełaruskich milicyjanieraŭ na kiepkach — rasijski ściah, ci płanujuć našy pravaachoŭniki jechać va Ukrainu vajavać na baku Rasii, ale adkazaŭ na hetyja pytańni nie atrymali.
— Z ukrainskim ściaham možna vyjści na vulicu? Jon ža taksama nie zabaronieny.
— Ja vam taki dazvoł nie dam, nie daju dakładniej — my nie kampietentnyja ŭ hetym, — śmiejučysia, adkazaŭ načalnik rajadździeła.
— Heta značyć, ukrainski ściah nielha, a ź litarami Z i V — možna?
— Ja vam nie mahu ni dazvolić, ni zabaranić, — adkazaŭ Vital Padziarun.
Kamientary