Spravu Maryi Uśpienskaj razhladaje Minski haradski sud u zakrytym režymie (sudździa — Valancina Ziańkievič).
Viadoma, što žančynu buduć sudzić jak «asobu, jakaja ździejśniła hramadska niebiaśpiečnaje dziejańnie, praduhledžanaje kryminalnym zakonam, u stanie biesśviadomaści, abo jakaja zachvareła paśla ździajśnieńnia złačynstva na psichičnaje rasstrojstva (zachvorvańnie)» (p. 13 art. 6 KPK).
Heta značyć, što joj nie pahražaje kryminalnaje pakarańnie, ale da jaje buduć prymianiać prymusovyja miery biaśpieki i lačeńnia. U žančyny jość niapoŭnahadovy syn.
Da taho, u śniežni 2021-ha, stała viadoma, što Maryja try tydni praviała ŭ balnicy ŭ Navinkach — jaje tudy adpraŭlali, kab pravieści psichijatryčnuju ekśpiertyzu.
«Maryja nie zmoža prysutničać na sudzie, tam u jakaści pradstaŭnika budzie prysutničać jaje maci», — raskazvała «Našaj Nivie» krynica.
Trahiedyja, nahadajem, zdaryłasia 28 vieraśnia. Tady padčas pierastrełki ŭ kvatery na vulicy Jakuboŭskaha ŭ Minsku zahinuŭ supracoŭnik KDB Dźmitryj Fiedasiuk i ajcišnik Andrej Zielcer.
Maryja była ŭ kvatery ŭ momant pierastrełki i zdymała incydent na telefon. SK paviedamiŭ, što Maryja «pravodziła videazdymku złačynstva i sadziejničała jaho ździajśnieńniu, zatrymanaja pa padazreńni ŭ saŭdziele zabojstva supracoŭnika KDB».
Paśla pierastrełki Maryja Uśpienskaja była zatrymanaja. Spačatku žančynu trymali ŭ IČU na Akreścina, zatym pieraviali ŭ SIZA, vystaviŭšy abvinačvańnie pa artykule 139 (zabojstva).
Kamientary